趙哲妤林熹瞳撞鬼兩份驚

玄學家司徒法正昨日聯同「怪談女」林熹瞳（Rachel）及趙哲妤（Uny）宣傳新片，Uny稱拍攝期間鬼上身，發狂亂打Rachel；Rachel則被鬼揞眼，險些被困森林，有入冇出！

司徒法正昨日率領新片《怪談電影－撩鬼》兩位女主角林熹瞳及趙哲妤出席記者會，席間播放電影精華片段，令人毛骨悚然，司徒法正說：「我哋去咗好多地方拍外景，發生好多怪事，兩個女仔都好驚，趙哲妤驚到話唔想拍落去，好彩Rachel從旁鼓勵，Uny先可以繼續拍埋。」

紙燈籠着火燒頭髮

Uny說：「真係好驚！拍呢套戲好刺激但好後悔，不過都幾過癮，最難忘被鬼上身，以為只係瞓着咗，後尾大家話番畀我知，我當時變咗另一個人，不斷用力攻擊Rachel，打佢塊面，當時身邊嘅紙燈籠着火，差啲燒到頭髮都唔知，要司徒法正幫我解，解咗三次至冇事。拍完返到香港，又撞車又出風瘌，覺得有啲嘢。不過都有開心嘢，師傅話我呢兩年有婚姻運，如果結到婚，呢世唔使憂。（有人追你？）係！個個條件都咁好！」

Rachel指被Uny狂毆未算最驚：「我仲試埋被鬼揞眼，喺森林取景，行行吓唔知點解偏離咗大隊，好在工作人員發覺得早，用咗半個鐘頭搵番我。」對於被拍得與黃玉郎拖手，她說：「佢只係禮貌上拖一拖我，依家咁寫，我怕冇人敢埋我身追我，到時嫁唔出，我惟佢是問。」