陳靜：睇醫生做心理輔導

對人歡笑背人愁，模陳靜（DaDa）一度迷失並萌生退出娛圈之念，但經電影拍檔杜汶澤一席話當頭棒喝，柳暗花明，留守到今日能躋身金馬獎女配角提名之列，令她確信堅守下去，總會有陽光燦爛的一天。

開頭唔覺娛樂圈複雜，可以係木人巷，又可以係大染缸，睇吓你點睇，但喺呢個圈愈耐，愈唔明點解個世界複雜咁多，經常要防備自己，冇以前咁開心，所以有一刻衝動想離開呢行。之前喺香港生活唔開心，冇自由又空虛，一來冇男友，屋企人方面，爹哋又唔太親，家姐有自己屋企，媽咪亦有Uncle，我就得番自己一個。雖然工作算幸運，但拍完《喜愛夜蒲》後擔心形象，做呢行又唔可以亂交朋友，冇人可以傾訴，發覺冇嘢可以滿足自己，真係好迷惘。壓力差唔多崩潰，情緒唔穩定，有時突然會喊，要去睇醫生做心理輔導。

想遊學被阻

之後有同媽咪、經理人講過不如我去澳洲遊學，但佢哋反對，覺得我唔應該逃避，要把握依家擁有嘅。當時拍緊《低俗喜劇》，有問過阿澤（杜汶澤），唔開心都有同佢傾，問佢會唔會試過空虛、咩都唔想要？佢話：「你試吓問自己，除咗呢行你仲可以做咩？」聽到佢咁講，我有反思自己冇乜學歷，細個本來可以去外國讀書但冇把握，依家後悔。佢講得啱，唔讀書我可以做乜？

佢點醒咗我，依家係有一個做自己鍾意嘅嘢嘅機會，咁樣諗成個人開心咗，加上睇醫生，情況開始好轉，自己諗開啲，覺得應該繼續行呢條路，於是豁出去喺《低》片演好呢個為上位唔怕出賣肉體嘅「爆炸糖」角色，好開心最近憑呢套戲入圍金馬獎最佳女配角，證明努力冇白費，繼續堅持係啱嘅，好多謝家人同經理人鼓勵，特別係阿澤一句說話，令我冇離開娛樂圈！

（明天待續）

口述：陳靜　

筆錄：專案組