亞姐分黨分派

「中立派」李妮：應該多啲關心羅霖

「我有留意羅霖婚變新聞，其實每個家庭都有問題。（黎燕珊話佢影衰亞姐？）呢個時間應該多啲關心羅霖，始終佢有個仔。珊姐如果真係咁講唔係好應該，因要顧及當事人感受。我依家同羅霖好少聯絡，因為脫離咗個會。（個會好多是非？）我覺得簡單就是美。（個會好混亂？）可能係外間諗法，我冇親耳聽過佢哋不和。」

另外，被指遭仁美清叙逐出會的顏子菲說：「我依家仲係會員，Keep住交會費，我有時都會喺啲活動度幫手做司儀。我唔覺得黎燕珊好嚴厲，佢都係為我好，愛之深、責之切啫！我唔了解羅霖，亦唔知佢同珊姐係咪不和。」

宮雪花兩邊插：踢我出會就好團結

「黎燕珊樣樣都要爭第一同名分，企親位都要企葉家寶隔籬，羅霖就鍾意扮大家姐，兩個人都當其他人冇到！（聞說佢哋不和？）佢哋踢我出會時就好團結……兩個都硬頸，都有機會不和。之前我提出過每隔一、兩年要選過會長同主席，但羅霖同黎燕珊唔鍾意，所以視我為眼中釘，以我露點為由踢我出會，其實當日羅霖都有露底啦！仁美清叙真係非常混亂，又唔民主！」

「撐羅派」黎淑賢：黎燕珊都影衰亞姐

仁美清叙副主席黎淑賢：「我唔覺羅霖影衰亞姐，黎燕珊都離過婚，如果因為咁就影衰亞姐，咁黎燕珊都係！黎燕珊同記者講羅霖分咗居都仲同劉坤銘同房，呢個係人哋家事，唔需要同任何人解釋！羅霖目前所有嘢都係為小朋友着想，作為好姊妹有咩事我都會幫，唔會質疑佢！」