王祖藍關心妍負負得正

頭上蓋上傑青光環，出爐傑青關心妍（Jade）和王祖藍從此便要規行矩步，始終能力愈大責任愈大，講錯一句隨時教壞細路！然而Jade和祖藍都曾在道德高地上迷失，重組成有用的人實是費心費神。不怕重蹈覆轍，因為舉頭三尺有傑青，揸住宗旨做人就好了！

誰說「三歲定八十」？這句話與剛獲香港十大傑出青年的王祖藍完全格格不入！今天祖藍在鏡頭前任人搓圓扁，被獎門人曾志偉糟質後仍然笑笑口，但誰知昔日祖藍年少輕狂，他自言「只有佢寸人，冇人可以寸佢」，最後搞到冇晒朋友，寂寞難奈，才洗心革面轉形象！

惡頂霸王

祖藍由幼稚園到小學，無論學業或課外活動都屬優材生，回首往事，他仍然津津樂道：「細細個我已經好叻o架喇！我間房最多就係獎盃，嗰陣參加比賽贏埋容祖兒添！」連天后都贏埋，難怪站在高處的祖藍變得目中無人！他自言讀中學時態度囂張，對別人批評多多，搞到班房日日上演課室版《金枝慾孽》，又自爆曾為班中霸王：「開會嗰陣人哋講咩我就Ban咩，講咩我都寸，其他人奈我唔何，因為我啲計仔最得！之後變咗有我講冇佢哋講，我覺得其他同學唔順眼，咪嘴藐藐同笑佢哋囉！」原來如今嘻皮笑臉的他也曾不可一世！

無敵是最寂寞，沒有朋友的祖藍惟有寄情拍拖，他自覺是大男人一名，曾以為女朋友能接納他所有缺點，坦言是個惡頂男友：「嗰陣我拍拖有三個原則：第一，我對你唔好，你都要對我好；第二，我暫時愛你，但你要永遠愛我；第三，我有時會諗吓第二個，但你只可以諗我。」霸道原則損人不利己，最後糟蹋了幾段愛情！

世事往往物極必反，走慣寸爆路線的祖藍孑然一身後，頓悟缺點，從此變得口甜舌滑，常常稱讚別人：「我依家每次諗到一條橋，仍然會沾沾自喜（說罷即大笑），但我都提醒自己係成隊Team諗嘅，同埋每日提自己讚多啲身邊嘅人。」回想從前取笑同學，自覺不對，如今變得成熟，學懂開懷接納別人意見。

氹人開心

冠上傑青銜頭，祖藍認為香港人與從前的自己非常相似，同樣諸多不滿，只對人，不對事，難怪他們負能量爆晒燈！他分享獨門快樂貼士：「如果一個人本身唔開心，我點氹佢都唔會開心，從來做娛樂嘅使命係畀想開心嘅人睇，只要我哋少啲不滿，份人都開心啲啦！」

後記......做好榜樣

王祖藍接受訪問前到餐廳醫肚，期間被十幾名行過的市民「點相」，不斷被邀請合照，甚至偷拍，他即非常有禮地向途人解說：「其實你哋邀請我合照完全冇問題o架，但千祈唔好偷影，我真係好驚被偷拍o架！唔該晒！」如此有禮貌，祖藍絕對是當下年輕人的榜樣，由他擔任「傑青」認真冇得輸！

唱過N首慘情歌，以為Jade是一個負能量到極致的人，不然何來悽慘感情直插心肝脾肺腎！但真正認識她的人就知道Jade實情是個一千億正能量戰士，釋放過的正能量足夠她回饋社會攞傑青。

偽善的人會在人前扮正義，人後放縱顯露本性，但Jade就是那麼真，即使未有傑青銜頭，可能已比傑青做的事更多：「攞唔攞到傑青對我分別唔大，不嬲都知藝人要做好榜樣，唔會話攞咗先去做，我估因為咁先可以攞到呢個獎，呢個獎對我嚟講真係好大鼓舞，令人知道相信自己係會有奇迹出現！」

言行救人

始終舉頭三尺有傑青，Jade知道自己一言一行可以救人，也可以殺人，不願一句說話教壞細路，令家長踩上鋼線！她說：「我知道自己要更加規行矩步，盡量唔好唔經大腦講嘢，好多年輕人都會聽我哋說話，攞呢個獎令我更加有說服力宣揚禁毒訊息。」冇理想同條鹹魚有乜分別？有了傑青這把尚方寶劍，做甚麼事也方便得多，Jade說：「我搞緊個『燃亮生命基金』，希望令戒毒嘅人重獲新生！大家都知好多低收入家庭冇錢交學費，但好多邊青迷失過後都希望重整生命，我希望幫到佢哋！」並非人人夠膽走入戒毒所了解戒毒者心情，Jade願意一試，那天如暮鼓晨鐘，直吹心靈：「入面情況好惡劣，只有普通被鋪，冬天要沖凍水涼，佢哋要自己執糞便，聽到佢哋嘅心聲、佢哋有幾後悔，嗰一刻就喊咗出嚟！」

險入歧途

驀然回首2004年，那時Jade事業陷入低潮，倘若鑽牛角尖萌生歪念，陷入死局的可能就是Jade吧！她說：「2004年係我最黑暗嘅日子，連酒吧騷都冇得做，事業一夜破產，個個都唔鍾意我，嗰一刻真係好恐怖！好彩因為信仰，我堅持唔好迷失，如果唔係，吸毒、酗酒、放縱情慾嗰個可能係我！」這是最壞時候，亦是最好時候，就是人生跌落谷底，Jade才可釜底抽薪：「喺人生交叉點，我選擇做義工填滿自己生命，可能我喺單親家庭長大，媽咪都冇放棄我哋，係好好嘅教育，我知道唔可以任性，要咬實牙關面對人生。」

後記......教化世人

曾說過攝影師哥哥貌似Jade得力助手阿小，朋友堆內經常以此拿來鬧着玩，Jade知道這搞笑的巧合，即時傑青上身，像聖母一樣點化我們：「玩還玩，笑還笑，千祈唔好人身攻擊！」和暖的聲音十分受落，知道了，這是最後一次。