Theresa感激傅母恩

傅穎（Theresa）於單親家庭成長，童年試過因家貧而要豬骨熬水當奶飲！為報答媽咪日捱兩份工湊大她，她畀家用時特別闊綽，但當提到爸爸時，Theresa欲言又止說：「我驚媽咪會唔開心。」

細個屋企經濟環境差，所以我出世一個月左右就送咗返鄉下，我記得嗰時係冇奶粉飲，要用豬骨熬水飲！最後留到三歲先返香港，嗰時我仲一口流利普通話，但冇同學仔同我傾偈，所以好努力學廣東話，搞到依家啲普通話又要從頭學過！

唔敢多講老竇

依家我屋企得媽咪、家姐、細佬同一隻八哥狗，爹哋媽咪喺我初中嗰陣就分開咗，但一家大細喺大時大節都會一齊食飯。同爹哋關係雖然係生疏咗，但每次一齊食飯都會好自然叫佢老竇，同埋夾餸畀佢，好似反射動作咁，但我都唔想講太多，因為驚媽咪睇到會唔開心！

可能因為父母分開咗，令我哋三姊弟更加錫媽咪，佢試過同時間打兩份工，一個人養大我哋三個，我成日覺得佢係一個女超人！印象中最深刻喺我七歲，多手切紅毛丹時唔覺意切親手，搞到成地血，最後媽咪帶我去醫院縫咗四針，因為佢緊張到唔記得帶錢，最後要由瑪麗醫院行番去上環屋企！所以，依家我哋三姊弟都會孝敬媽咪，畀家用、送禮物都會好疏爽，但係媽咪好慳，成日唔肯去旅行，話要幫我哋儲錢！

講到做家務，我小六就開始入廚房，同家姐每日輪流煮飯，但係由細到大，我都唔肯洗碗，我寧願好似《阿信的故事》咁抹地都唔洗碗！依家我可以放啲碗幾日都唔洗，等我啲朋友或媽咪上嚟先幫我洗，哈哈！（明日待續）

口述：傅穎

筆錄：音樂組