糖妹Dominic信愛

宅男女神愛上大隻型男，產生了「天生一對」的幸福名詞。糖妹（黃山怡）和Dominic（何浩文）這對圈中小情人，身高相差一呎有多，但彼此的心卻零距離，拍拖短短一年堅守愛的信念，哪怕娛樂圈多情陷阱處處，心中依然不動搖。

戀情篇：冇晒飛來蜢

圈中不少女星靠Big爆身材上位，男星近期亦愛晒肌，早前就有一大班肌肉型男襲港風靡城中港女，而圈中除了羅仲謙及陳偉成等肌肉男外，還有一個何浩文（Dominic），他是性感女神周秀娜的師弟，亦是「宅男女神」糖妹的男友。

他倆年初被踢爆戀情，也正式叫宅男港女們死心，Dominic笑說︰「大家一齊好開心，公開分別唔大，係少咗女仔埋身搭訕。雖然各有各忙，但珍惜相處時間！」俊男配美女看來合襯，但二人的身高差距卻成為話題，女友5呎爭幾吋，但他卻接近6呎，Dominic說︰「愛情上呢樣嘢係冇關係，外形唔重要，感情嘅高度同身高係唔關事！」

講Feel唔講樣

能夠抱得宅男女神糖妹歸，難道Dominic的追求招數非常厲害？他卻笑言與糖妹只是因為感覺走在一起︰「互相了解一段長時間就一齊，冇話邊個追邊個，成件事好Amazing，由朋友變情侶係一件開心事！」話雖如此，原來在Dominic心中暗藏一套追女大法︰「諗過對住女仔唱歌跳舞，對方應該會好開心好享受，不過未試過。」說到興起，他更自爆於英國讀書時曾有匿名少女出動愛心三文治向他示愛︰「有人將三文治貼咗張紙仔放喺我住嗰度，後來先知係一個女仔整，但佢最後冇親自表白。」

也許大隻兼靚仔是不少港女眼中的筍盤，但對於Dominic來說，外表不是吸引異性的重點︰「可能高大會畀到女仔安全感，但係性格先係最重要！」但他亦認為大隻在工作方面有優勢︰「觀眾係會先留意你先，最近都有好多男仔注意身形，哈哈！但之後都要多下苦功，不斷進修。」

事業篇：多進步機會

愛情得意，Dominic的事業亦有不錯成績，早前參演的電影獲好評，更為他打開了影圈的大門，雖然得到王晶賞識及參演新片，但他未有自滿︰「一直希望試唔同角色，之前第一次做警察，以後有機會做蠱惑仔，唔知有冇機會着古裝做大俠呢？不過一定唔可以扮女人，哈哈！怕人嫌我大舊，但如果觀眾接受都可以試吓。依家自己事業啱啱開始，我會繼續努力，有排都未到家鄉呀！」至於會否拿已上位的大隻仔羅仲謙比較？他則說︰「佢係有好多機會，我都幾羨慕，但有機會就要珍惜！」未知是否有弦外之音呢？

後記：拒絕再奀

跟Dominic完成訪問後，他不是去工作，更不是「蜜」會女友糖妹，反而趕往健身室做Gym，別看他現在Fit到爆，原來他曾是一個瘦仔，他說︰「之前我好細隻，又白又瘦，冇乜肌肉，但係因為鍾意跳舞，所以要練大隻啲，之後咪Keep住練。」望着他大大舊的肌肉，看來真是下了不少苦功呢！

戀情篇：大家都專一o架！

說真的，娛樂圈靚仔靚女多的是，藝人在圈中找另一半，或多或少擔心有「偷食」和「被食」危機。新一代宅男女神糖妹，甜美笑容是她的標誌，早前她大方承認與跳舞組合Bro 5成員Dominic拍拖，更不時分享甜蜜小事，問到會否擔心男友誤中多情陷阱？糖妹說：「唔怕！對佢好有信心，佢拍戲同藝人親熱都唔擔心，因為大家都有個互信信念。」

糖妹的愛情觀很簡單，就是長久兼專一，偏偏是今時今日後生仔女不易做到的：「我好專一，年紀大玩唔起呀！好多女仔對感情都幾兒戲，有唔少一腳踏幾船，但感情方面我比較保守，底線係唔可以背叛另一半！以前遇過兩次花心男，初戀係被背叛，傷心咗好耐！另一次係個男仔去外國讀書分手，後來發現佢喺香港時已經瞞住我追女仔！真係唔明呢啲男仔諗乜。」

搞Gag笑死我呀！

問到當初愛Dominic是否貪其有型大隻？她笑說：「你估我咁膚淺咩！識咗佢好耐先拍拖，大家覺得性格幾夾先一齊o架！」性格樂天的糖妹欣賞Dominic充滿正能量，經常搞奇怪爛Gag：「你知啦！我本身咁鍾意笑，最怕嗰啲成日自怨自艾嘅男仔，佢好搞笑o架！就算大家依家各有各忙，都一定會通電話維繫，聽到佢把聲就想笑。」

事業篇：唔想差過佢喎！

何時關係會更進一步—結婚？糖妹坦言有排都未到適婚年紀，完全沒有計劃，目前跟男友都以工作為重：「人大咗覺得就算唔結婚都OK喎！同另一半開心就得，結婚、擺酒、影婚照都係好形式嘅！佢依家忙緊拍戲，見佢咁努力，自己都唔敢退步！」

跟無綫簽了三年藝員合約的她，與金剛擔任《勁歌金曲》主持已有一年，早前有傳崔建邦「踢走」他們，她說：「依家仲未被飛，其實公司畀咗好多機會我！之前客串張智霖、胡杏兒新劇《衝上雲霄II》，第一場已經要同張智霖對手，仲要我爆喊，我平時咁正能量！不過我係感情好豐富嘅人，上YouTube打『感人』兩個字，之後再諗啲唔開心嘅嘢，就喊得出喇！」

下一步，糖妹和糖兄將會製作唱片，與很多亞洲猛料歌手合作，她說：「搵到范曉萱作曲，佢好有音樂才華，又靚女！仲有日本動漫歌手秋赤音，好期待會有火花。」

後記：圓置業夢

糖妹跟父母和比她年輕十一年的弟弟同住深水埗，鏡頭前經常開玩笑的她，自爆在家中是一位惡家姐，因為弟弟年紀尚小，思想仍未成熟，所以要嚴加管教。工作一個接一個的糖妹想家人有更好的居住環境，定下明年買樓目標，孝順女，加油呀！