楊汀叮廚藝「糕」手多煮意
要找一個入得廚房出得廳堂的完美情人，看似大海撈針，但Angelababy前師妹楊汀叮就絕對符合以上條件。讀書時因父親患病，為了替母親分憂而一手包辦父親起居飲食的汀叮，小時候已練出一手好廚藝，近年更迷上炮製蛋糕，一來滿足烹飪欲，二來為好友送上驚喜！
對整蛋糕情有獨鍾的楊汀叮，由自家製作簡單的芝士蛋糕開始，自此對整蛋糕愈來愈感興趣，兩年前開始找老師私人教授，她說：「自己整只能夠做好簡單嘅蛋糕，但如果又要好食，又要賣相有趣，就真係要跟老師學！」談到整蛋糕，汀叮雖頗有經驗，但她仍謙稱自己有很多不足之處：「抹Cream我真係唔叻，好易有窿同起角，整好耐都整得唔好，但係老師真係好快手，幾分鐘就搞掂！其實抹Cream嘅秘訣主要係手要定，左手一路轉盤嘅同時，右手就要好定咁抹，次次整完對手都好攰！」
有豐富整蛋糕經驗的汀叮，談到最難忘一次經歷時笑說：「之前整過一個花花蛋糕，整咗成八個鐘。咁長時間係因為有好多款花要整，啲花瓣要一塊一塊咁移好個位，再砌成一朵花，我整咗6大朵，然後再整其他細花仔，整咗好耐好耐，整到我第二日腰痠背痛呀！」
手唔可以太熱
老師稱讚汀叮有天分及有耐性，汀叮說：「佢客氣啫！不過原來整蛋糕要整得好，對手唔可以太熱，太熱嘅話啲Cream會好易溶，好彩我隻手本身都好凍，可能係咁老師覺得我有天分喇！」
大功告成，汀叮扮兔仔影相。
入得廚房的汀叮同樣出得廳堂。
雞絲粉皮亦是汀叮的拿手菜。
汀叮曾悉心製作生日蛋糕賀前經理人Kim牛一。
製作過程逐格睇
Step 1 先用白朱古力倒兔仔模，然後放入雪櫃凝固。
Step 2 用攪拌器打Cream。
Step 3 將打勻的Cream抹在蛋糕上，手要定，否則容易有窿及起角。
Step 4 將朱古力粉灑在蛋糕上，增加味道及顏色。
Step 5 用染了不同顏色的麵粉製作紅蘿蔔。
Step 6 用Cream唧花及作最後裝飾。