胡定欣揭肚皮冧闊少

胡定欣前年狠飛馬國明後，今年初搭上創作界闊少沈栢淳（Patt），兩人相戀大半年，Patt不時以銀彈及浪漫攻勢冧女友，泊得好碼頭的定欣為箍住男友心，日前與男友於中環等車時，竟當眾拉起上衣，打出肚皮冧仔！

現年31歲的胡定欣，年前與馬國明演出《舞動奇跡》時撻着，兩人拍拖一年，有傳定欣嫌馬國明悶蛋而提出分手，不過後來有指定欣悔恨不已，曾極力翻撻，又低調客串男方有份演出的劇集，甚至爭取一齊出埠工作，但最終仍是箍煲不遂。一直尋覓真愛的定欣，今年初搭上一名家境不俗、製作公司老闆、兼美術指導的創作界闊少沈栢淳，男方除以禮物攻勢冧定欣外，早前更為她大搞生日船P，盡顯體貼一面。今次定欣泊得好碼頭，當然要出盡法寶箍實男友！

大方承認戀情

日前晚上9時許，定欣與男友Patt在灣仔食店買完外賣，由女方負責揸車，然後直駛中環某個停車場。泊好車後，他們步出到門口等的士，沿途有說有笑，身穿跌膊上衣的定欣，與男友傾談時動作多多，除不時騷首弄姿外，又情深款款與男友對望撒嬌。兩人等了一會仍未有的士，定欣突然於大庭廣眾下掀起上衣，打出一小節肚皮給男友看，最後雙雙返回男方寓所溫馨兼開餐。

有新歡甜到漏的胡定欣，昨日接受電話訪問時承認蜜運中：「我哋近呢幾個月開始拍拖，新男友係朋友介紹，大家性格好夾，所以咪走埋一齊！加上佢職業係做廣告，算係半個圈中人，會好明白我哋嘅工作。（冧功了得？）佢上個月陪我過第一個船河生日Party，好開心！有份出席Party嘅胡杏兒都戥我開心，大家都希望對方搵到幸福！（男友畀幾分？）暫時唔畀分，我哋仲發展中！」

馬國明送祝福

馬國明對於舊愛有新歡，未感酸溜溜，反而大方祝福：「我哋平日喺廠見面乜嘢都傾，佢有新男友未話我知，可能佢想穩定啲先講，如果係真嘅，佢搵到個錫佢嘅男友我當然祝福佢啦！」早前有指定欣「翻撻」馬國明失敗，惟有另覓新歡，馬國明即維護舊愛說：「我再講一次，定欣冇死舌累我，亦唔係港女，只係報道一廂情願寫，你哋唔好咁話佢！我哋分手又唔係有第三者，當然仲係朋友，上月佢生日我都有傳短訊祝賀！」