JJ展晨光 負能量激發成長

剛度過30歲生日的「宅男女神」賈曉晨曾因為與樊少皇的戀情徘徊「愛與痛的邊緣」，面對連番負面傳聞，最終她亦不理世俗眼光，忠於愛情，二人最終修成正果，這段情路確是走得不易！回想當初，JJ在面對工作壓力、種種是非的情況下，只能以微博作為發洩工具，故不少負面字句都在其微博隨處可見，她說：「之前有報道屈我，真係好嬲，最憎人屈我，所以我就喺微博發洩！其實有朋友都講過：『微博有好多人睇，不如你寫多啲正面嘢啦！』但嗰刻真係諗住發洩完就算，有時解釋咁多都冇用！」

買樓最有保障

自從走過峰迴路轉的愛情路後，JJ上了寶貴一課，整個人豁然開朗，其微博都變得「晨光乍現」：「心情真係好番好多，長大咗，好多嘢都向好嗰方面諗，人哋點睇都唔會咁易影響到自己，因為我唔係為人而活！」現時她恍如有金剛不壞之身，更主動鼓勵受情傷的人：「千祈唔好為愛情自殺，呢個世界仲有好多人愛你，例如父母，所以唔應該淨係以愛情而活！如果唔開心，試吓睇令人開心嘅電影，或者將心底話講出嚟！」

踏入三字頭，加上剛出席好友婚禮，卻未激起JJ結婚之心，但她自認擁有小女人心態：「其實我係一個好重視家庭嘅人，事業唔係擺第一。人愈大，我就愈想擺家庭為先，唔想再做女強人。」雖然JJ認為「愛情」重要，但終究不可以「有情飲水飽」，對於理財觀也有自己一套：「我鍾意買樓，畢竟成日靠工作都唔穩定，如果買到一個物業，之後慢慢供，到物業屬於自己時就租畀人，咁都唔錯！」

恨放長假抖抖

JJ出道至今歌影視三線發展，面對排山倒海的工作，她有時也分身不暇，她說：「年紀愈來愈大，接觸太多唔同類型嘅工作，真係有少少攰，真心覺得自己嘅Energy冇以前咁勁！加上之前工作壓力太大，試過內分泌失調，所以都好想出年年中可以乜都唔理，去一個唔識嘅地方休息！其實有好幾年冇試過去一個長時間嘅旅行，好想搭火車去唔同嘅國家，例如去吓歐洲或者美國西岸，我覺得會幾浪漫！」不過一個人旅行難免孤獨，問她最想與誰同行時？她即冧笑地說：「希望可以同鍾意嘅人一齊去！」這個「鍾意嘅人」是誰？相信也呼之欲出！

後記：被點相

雖說化妝品是女人恩物，不過JJ自認懶惰，有時亦會素顏出街，只戴帽及眼鏡「遮掩」，但近年知名度漸高的她，經常被輕易認出。最令她O嘴的，莫過於曾試過以「包冚Look」出街而被認出：「試過戴眼鏡、帽、口罩去睇醫生，淨係騷咗對眼出嚟，都畀人嗌得出個名，佢哋真係好犀利！」