Rain脫地獄 峰迴情路學睇人

李彩華（Rain）與賈曉晨（JJ）在愛情路上飽經起跌，悟到「愛一個上一課」的道理。剛甩拖的Rain決定在情路放慢腳步，暫時選擇與工作談情，享受單身樂；JJ與武打影星樊少皇的戀情，幾經波折，亦總算穩定下來，繼續晒愛！

現年28歲的「黃金盛女」李彩華，近年屢受情傷，但從中吸取教訓，現時寄情工作，縱有異性追求，她亦寧願「睇定啲」及加深了解才開始，不再重蹈覆轍！

身為「天蠍女」的Rain說：「以前真係比較倉卒，睇得唔夠耐，依家唔同，就算有人追，都要睇一段時間，睇到我認為OK為止。早排分手，曾經有個追求者同我講：『不如一齊！』我就話會唔會太趕呢？有過幾次愛情經歷，明白到細水長流嘅道理，談情說愛要由朋友做起，慢慢了解，Step by Step，之前太多經歷，加上一時衝動，令我對愛情有啲驚。」

遭前男友侮辱

Rain近年在內地拍劇狂吸金，拍劇少不免有親熱戲，她憶述一位舊愛的「醋底」往事：「拍戲難免有親熱戲，係工作一部分，但之前有個男友知道後竟然Send侮辱短訊鬧我，我覺得好過分，同呢個人散咗之後，反而覺得Free咗，脫離地獄一樣，唔需要再受氣！」

縱使飽歷情傷，Rain沒有自殘，反而積極面對，除了與母親及朋友傾訴，還與「主」傾心事：「今年生日受浸洗禮，主真係幫我好多，以前唔算太信，但當我有唔開心，佢會好保護我，之前有段關係好痛苦，我同主講不如解決佢，冇幾耐真係Over（完結）咗，感謝主令我完結痛苦經歷。」

Rain不諱言怕寂寞孤獨，她說：「以前一冇人同我分享，就會亂諗嘢；但人長大咗，如果對方真心愛我，係需要時間了解，我依家唔急拍拖，反而繼續裝備自己。（擇偶條件改變？）冇，仍然要溝通到、心胸廣闊，外表冇乜所謂。」

直認遇人不淑

問到曾否遇人不淑或受騙？Rain說：「可以咁講，但我會冷靜理性處理，雖然『放手』嗰下好痛，但脫離地獄嘅感覺又幾好，當然緣分到咗我會接受，順天而行。（主動？）唔會，始終係要男方主動，我比較慢熱。（喺內地搵男友？）真係唔知，任何國家、國籍都可考慮。」對於被拍到與「肥版田亮」拍拖？Rain笑說：「唔係啦！佢係我朋友咋！」

既然愛情未有着落，Rain索性寄情工作，早前與台星朱孝天拍《我拿青春搏明天》，其中一場戲講述她坐橡皮艇玩漂流，因為水流湍急，令她飽吃驚風散，幸劇組做足安全措施，最後亦順利完成。

後記：自由身

Rain在內地拍劇甚為吃香，今年又有千萬元進帳，認真和味！工作亦已排到明年初，Rain笑說：「趁依家大家仲鍾意睇自己做戲，梗係努力拍劇賺錢，加上依家冇感情牽掛，屬『自由身』，冇顧慮就安心好多。」