Celia K.不死鳥浴火重生展翅高飛

天時地利人和，六個字演繹了o靚模郭穎兒（Celia K.）的演藝前半生。在模界載浮載沉六年時光，正當她決心放棄時，上天突然賜予她重生的機會—打碟、出寫真和拍電影，頑強得如曱甴般死去活來的她，願望只有一個：「想行出街嘅時候係人都認得出我係郭穎兒！」

過去：灰到想轉行

要數今年彈起的o靚模，腦海應會浮起郭穎兒（Celia K.）這個名字，短短一年，她極速完成了o靚模走紅方程式—出寫真、打碟、唱歌，還擔正做電影《一路向西》女主角，成名路看來一帆風順，原來背後隱藏了六年不為人知的淒酸。

19歲成為模特兒的Celia行騷、主持、唱歌……總之講得出的工作都試過，但一直半紅不黑，有多張化妝師證書的她去年到了台灣兩個月深造，本打算疊埋心水全職做化妝師，放棄再發明星夢：「嗰時我真係諗住唔再試！轉過三間模特兒公司，都做唔到乜嘢成績。」就在最失意的時候，她現時的經理人施念慈突然致電：「佢話想簽我，但係當時我好大掙扎，唔知前面條路點行，最後同屋企人商量，決定簽埋呢間就唔好再換，紅就紅，唔紅就由佢！」

當下：機會接住嚟

谷底翻身，令Celia更珍惜所有工作機會，因為她明白一切得來不易，還笑言自己這種打不死的精神，跟她最討厭的曱甴極為相似：「我好似曱甴咁拍幾次都唔死，你以為佢死咗，點知佢又繼續躝！」o靚模轉型做演員的例子多不勝數，對拍戲有信心的Celia亦想朝着這方向發展，但她認為拍戲跟影寫真並無衝突，明年亦打算再推出個人寫真：「到時會寫吓嘢，希望講吓呢年發生嘅事，因為係我25年嚟最犀利嘅轉變。」

首次演戲即擔正，Celia慶幸能駕馭角色，畢竟戲裏戲外性格相似，演起來手到拿來：「個角色係個好地道嘅港女，好巴渣！好多人睇完都話好似我，哈哈！」接拍被定為三級的《一》片，她坦言最初都有些擔心，但其實很多港產片包括《低俗喜劇》及《囡囡》等，雖然同樣是三級片，但意識並不過火，Celia認為床上戲是最大挑戰，但她已克服障礙，將來就算拍甚麼電影都冇有怕！

未來：個個都識我

拍罷這套電影後，有不少本地及內地片商都想找Celia拍戲，她的目標是成為一個人人叫得出名的演員：「暫時回響都唔夠大，想喺影壇上有個定位，出到街人人都可以認得我！」她大有機會憑《一》片角逐明年香港電影金像獎「最佳新人」，但她認為三級片要攞獎有難度，而拍戲亦非為攞獎。對她來說，演藝之路並無終結的一天：「呢行樣樣都要識，唔係好易畀人淘汰，不過我點都唔會離開呢一行，可能最多轉做幕後。」

後記：港女剛柔並濟

演港女演到淋漓盡致的Celia，希望其他人見到她演繹的版本時，會對港女改觀：「香港嘅女仔講嘢係大聲啲！但佢哋唔使靠人，自主能力高，令到佢哋個感覺好強勢，同男仔一樣要有尊嚴，不過要溫柔嘅時候都可以好小鳥依人！」