朱千雪被點孤身瀛戰

無綫無懼最近中、日關係緊張，公然「挑機」，派出應屆港姐季軍朱千雪赴日本沖繩選美！朱千雪昨日死撐不擔心人身安全，隻身到當地逗留3周充當「友誼小姐」，與各國佳麗打開溝通之門！

最近中、日因釣魚島事件而漸趨緊張，梁朝偉日前因獲邀拍日資電影而遭網民炮轟，最終被迫辭演！羅志祥及楊冪為表愛國，更自發性地取消赴日計劃！不過，無綫竟無視民憤，昨日大費周章安排應屆港姐張名雅、黃心穎及岑杏賢返電視台，齊齊舉行熱烈歡送會，預告朱千雪後日隻身赴日參加本屆《國際小姐》競選。難得朱千雪心情大佳，並以一襲超低胸晚裝亮相，露出4吋事業線！張名雅及黃心穎等送上恤髮器及耳環，氹得朱千雪勁開心！

提到中、日關係緊張，朱千雪坦言覺得問題不大，更認為今次是學習獨立的好機會：「都慣咗自己化妝，可以照顧自己！（中日關係緊張？）唔係太擔心！因為同各國佳麗一齊，大會會負責我哋嘅人身安全嘅！」事後她再接受電話訪問時表示，不少粉絲微博留言打氣，故不擔心會遭網民炮轟，此行只想專心選美。她透露準備了十多套戰衣，以最佳狀態迎戰：「我揀咗大批小禮物，包括電話繩同Tee等，計劃送畀其他佳麗！」

不容派人陪同

無綫外事部副總監曾醒明昨日接受電話訪問，回覆記者查詢有關朱千雪赴日的人身安全問題：「我哋問過大會，佢哋確保佳麗安全，況且呢個係民間活動，同釣魚島事件係兩回事，衡量過後我哋決定派人參加！（冇諗過派人去陪朱千雪？）根據國際選美慣例，唔容許經理人或保母陪同！」