Toby怨翟威廉冇Heart

前港姐陳庭欣（Toby）早前25歲生日，相約同屆的港姐港男慶祝。緋聞男友翟威廉送蛋糕，卻被Toby嫌棄冇心思！

早前，2010年港姐冠軍陳庭欣（Toby）與多名同屆港姐港男吃日本菜，慶祝25歲生日。莊思明、張秀文、李雪瑩及文凱玲等好友輪流向壽星女送吻，思明更與Toby肉緊咀嘴，場面搞笑！至於男士亦有輕吻Toby送祝福，問到在場的緋聞男友翟威廉可有咀她？Toby即扮失憶說：「唔係好記得，應該有啩！都只係代表祝福啫！」問到翟威廉送了甚麼禮物？她即撒嬌埋怨對方毫無心思：「佢送咗個蛋糕，好似樓下臨時臨急買咁，又冇我個名，唯一叻就係佢記得我鍾意食栗子味，比舊年進步，但明知我唔飲酒竟然送酒。（嫌佢悶？）佢比較不拘小節啫！」

提到生日願望，Toby希望儲到首期買樓，並繼續與父母同住：「都想繼續住番港島區，因為父母住慣咗，地方唔使好大，800呎已經夠，最緊要舒服實用。」近年多做主持的她希望事業有突破，多參與拍劇，最想飾演女警：「覺得好型同埋有藉口畀自己操Fit啲，我依家引體上升一下都做唔到呀！另外就係想食極唔肥，因為Keep住都要拍飲食節目。」

唔認「中女」

感情方面，Toby稱順其自然，身為家中獨女的她想抽更多時間陪家人，父母亦沒有催她拍拖：「感情事冇特別諗，有固然好，但一啲都唔心急，有個好朋友竟然祝我中女快樂，我澄清我仲好後生咋！」