As One整變形月餅

少女組合As One成員Oli、Elfa、Shin及Nata，相約整冰皮月餅預祝中秋節，4名90後少女整餅時極度興奮，Shin笑言聯想到炮製朱古力給男友，論盡的Oli則不慎將月餅整成薄餅，令人笑爆嘴！

中秋佳節將至，少女組合As One「處女下海」首嘗整月餅滋味，成員Oli、Elfa、Shin及Nata由經理人黃柏高提拔，更是郭富城排舞師Sunny的弟子，舞技不容忽視，但整餅手勢又如何呢？

4位90後少女甫抵達即跳跳紮勁興奮，跟足導師Angela的指示，完成搓冰皮及包綠豆餡步驟，但最困難的原來是最後「倒模」一環，4人希望整成貓咪及兔仔形月餅，Elfa、Shin及Nata成功過關，但Oli的製成品卻「扁撻撻」如老婆餅，令其他成員笑爆嘴！她解釋因一時心急才用錯力，並強調平日也有整曲奇習慣，並非嬌生慣養，她自我安慰：「形狀唔緊要，最緊要食得，我呢啲係創新呀！」

煲蠟玩出禍

對於首次整餅，甚少下廚的Shin說：「好似變得女仔咗咁，仲有整朱古力畀男友食嘅感覺！」Elfa則自誇有天分，可轉行做整餅師傅。談及難忘的中秋經歷，她們透露通常與家人食月餅及賞月過節，Nata難忘有年與家人煲蠟，結果樂極生悲：「表姐條喇叭褲燒着咗，好彩冇受傷，但之後唔敢再玩！」她笑言每年的燈籠都會燒爛，被Elfa取她「惹火」。