朱玲玲中西戰衣娶新抱

霍震霆兒子霍啟剛與「國寶」郭晶晶將於今年11月11日舉行世紀婚禮，將榮升奶奶的朱玲玲雖不願多談「剛晶」婚宴，但昨日出席活動時卻難掩喜悅，自爆將送贈未來新抱珠寶及傳家之寶！

有「最美麗港姐」之稱的朱玲玲，昨日與前港姐陳法蓉及王愛倫等出席慧妍雅集活動。提到兒子霍啟剛與郭晶晶將於11月11日舉行婚宴，早前在活動上首爆「剛晶」今年結婚而自責多口的朱玲玲，昨日避忌地說：「嚟之前都知道你哋會問，所以打咗電話畀囝囝問佢咩講得咩唔講得，佢都叫我唔好講太多。」

唔同「國寶」住

問到可有準備禮物給一對新人，她說：「唔講太多喇！（送珠寶首飾？）都會，都係私人嘢！（傳家之寶？）少少啦！都係紀念啫！」而正準備服飾的她透露當日在家中斟茶時會穿旗袍，晚上則會穿一套西式晚裝。日前有報道指霍家去年所贈、價值三千萬元的北京豪宅將成「剛晶」新房，問到二人是否長居北京，朱玲玲說：「佢哋會兩邊走，晶晶都有物業，唔使特別買。（會住北京豪宅？）佢哋冇同我講。（喺香港會一齊住？）唔會，佢哋有自己屋企。」至於有傳婚宴假亞洲博覽館舉行，她昨日親證場地是灣仔會展，並將筵開逾百席及以中式為主。