鄭希怡望親情生生世世

鄭希怡（Yumiko）是家中的掌上明珠，父母對她疼愛有加，非常信任，縱使得悉女兒發生不快事，也擁抱她默默支持，並無責怪，故Yumiko希望下世能繼續做他們的女兒。

我係家中獨女，父母住喺上海，爹哋60歲，媽咪57歲，有佢哋做父母係一件非常幸福嘅事，細個我幾反叛，15、16歲嗰時喺香港，放學好夜返屋企，好唔黐家，因為唔想被箍住，想要自由，約朋友去唱K，曾經令佢哋唔開心，但長大定性後，我嚟香港做嘢，父母都好支持，其實佢哋好識照顧自己，唔使我畀家用，反而仲問我夠唔夠錢使，所以我唔算太多家庭負擔，令我更加放心喺香港娛樂圈發展。

父母好相信我，我經歷過唔少不快事，佢哋每次見到我會Hug（擁抱）我同撐我，好希望下世繼續做佢哋個女，早排喺布吉整傷條頸，我有啲隱瞞佢哋（指病情），只同佢哋講扭親條頸，雖然佢哋有睇報道同埋好多朋友都打畀佢哋講我頸背條疤有幾長，但佢哋仍然信我「扭親」，所以我決定和盤托出。

唔收Cheque

雖然依家賺到錢，但都唔使點畀家用，幾個月前我過咗一張6位數字嘅支票畀佢哋，但佢哋唔要，叫我留番畀自己，我喺佢哋心目中永遠係小妹妹，佢哋幫我諗定晒好多嘢。當父母知道我話結婚就開心到爆，仲話會約埋親戚組團嚟香港，唔想我操心飛返去擺酒。父母問過我婚後會點，我同佢哋講會繼續娛樂圈工作，同時亦考慮搞生意，原本想搞飲食，但比較困身，反而服裝生意會有興趣，希望賺到錢好好報答佢哋。

後記：「友」心人

屈指一算，筆者與Yumiko相識起碼8年，她性格爽朗率直，是圈中難得的「義氣仔女」。雖然近年Yumiko常返內地工作賺人仔，但她相當有心，每次返港也盡量抽空與筆者短聚閒聊，認真「友」心，衷心祝福她和儲哥白頭到老，甜蜜恩愛！

（全文完）

口述：鄭希怡

筆錄：專案組