Yumiko「是但啦」抗醜化

鄭希怡（Yumiko）入行至今雖是非不多，但其外表經常成為談論焦點，除了屢傳整容外，甚至被嘲笑似人妖，幸好她的EQ極高，對負面報道一笑置之。

入行咁耐，成日畀人傳整容，講真若然整容嘅話，我應該會再靚啲！依家十個女仔拼埋一齊，我諗我反而唔係似整容嗰個，我對呢啲報道一笑置之，是但啦！依家EQ愈來愈高，每年都高少少，我之前做過醫學美容代言人，有打過Botox嘅，但「大執」就冇喇，咁樣唔知算唔算整容？算嘅咪當有囉！唔算就冇囉！反而之前因為頸傷，令個人變「直」咗，連「寒背」都改善埋。

除咗整容，我都聽過畀人話似「人妖」，但我都係嗰句：「是但啦！」曾經有同事同我講，佢話若然我嗰排自信心爆棚、心情好好嘅話，即管叫我去討論區睇吓，話我睇完後肯定「跌倒」兼笑唔出，當初睇完之後都會望吓鏡：「乜似咩？」

以拉姑作榜樣

當時心裏會有兩種諗法：一種係「明明覺得我唔係，但又夾硬話我似人妖！」我認為係惡意人身攻擊；另一種係「真心覺得我係女仔，但點解會話似人妖o架？」我覺得呢啲係好心地。依家我會揀開心報道嚟睇，睇嘢諗嘢變得正面，人都會快樂，做人有時識得苦中作樂，樂觀嘅人做乜都會事半功倍。我想講拉姑（狄波拉）係一個好好榜樣，無論佢係老婆、媽咪或者長輩身份，佢都樹立咗好榜樣，佢睇嘢及諗嘢角度有好多方面，令我受教不少。（明日待續）

口述：鄭希怡　

筆錄：專案組