鄭希怡發達靠霆鋒

入行10年的鄭希怡（Yumiko），近年北上搵人仔，短短數年間，密密拍劇及登台已吸金近千萬元，認真和味！她不諱言感激「伯樂」謝霆鋒及狄波拉的一番話，令她決意外闖！

我喺2000年簽約英皇，跟過陳潔靈學唱歌，亦有學跳舞同化妝，到2002年正式同Maggie（劉思惠）、Mandy（蔣雅文）組成「3T」出碟，之後就作個人發展，先後出咗11張唱片。

出咗道10年喇！睇番過去嘅事業發展算係得多過失，但有啲目標仍然未達到，好似開演唱會咁。係有啲唔甘心，但慶幸咁多年冇渾噩度過，成績雖然未算好標青，但又未至於冇人識，算中規中矩，可以有更多進步空間。嚟緊我會出新歌，有新嘢畀大家睇，雖然《相對濕度》未話勁Out，但都要有新元素。

當年做新人時問過公司借錢，借咗6位數字「學費」，學化妝、跳舞同唱歌，依家已經還晒。會唔會吃力？還好啦！其實嗰時冇諗過點還，總之爭住先，每個月生活費有5千蚊，都算夠使，始終人係有「彈性」，加上我本身唔算大使，當年又p:有住宿，都唔成問題。

2007年，霆鋒建議我返內地做嘢，佢話：「返大陸啦！依家係好時機。」於是我嘗試北上闖一闖，當時唔知自己做到啲乜，但之後不斷拍劇，全部收入係人民幣，幾年密密賺咗近千萬，仲可以喺內地置業畀父母。以前唔識投資，依家就會，所以我好多謝霆鋒當年嘅鼓勵，仲有拉姑（狄波拉），佢鼓勵我：「妹！你做戲好過唱歌，最緊要搵到一個啱自己嘅角色。」

康復後揀Job接

之前喺泰國墮坡受傷，休息咗一段長時間，10年來未試過放咁長假，受傷期間唔知可以做乜，其實我好需要工作動力，所以康復或者結婚後，我會繼續做嘢，但會揀自己鍾意嘅劇本，30歲後再為自己爭取想要嘅生活模式。我同公司協調咗，佢哋冇當我係細路女，而未婚夫亦好支持。（明日待續）

口述：鄭希怡　

筆錄：專案組