謝安琪屙到甩嘴

謝安琪昨日出席活動，自爆感染諾沃克病毒屙了幾天，導致前晚在《星光熠熠耀保良》表演時甩嘴，目前仍不敢與兒子太親近。

歌手謝安琪（Kay）、鍾舒漫及洪卓立等昨日出席酒會，擔任大使的Kay談到前晚在《星光熠熠耀保良》表演時甩嘴：「有啲歌詞唔記得咗，當時有少少失神，因為我啱啱喺汕頭返嚟有腸胃炎，感染諾沃克病毒，已經屙咗幾日，保良騷嗰日本來我要行樓梯同着高踭鞋都改咗企定定同着平底鞋，因為腳軟，怕企唔穩。」

黃心穎倒掛標青

她又表示現在不能過分親近兒子：「醫生叫我唔好同個仔一齊食飯同錫佢。（咁老公呢？）老公都唔好啦！」問到有否跟老公張繼聰分房瞓時，她反應甚大地說：「一齊瞓，如果咁小事都要分房瞓咁仲得了？會變苦命新抱。」至於鍾舒漫則表示下月中會到馬來西亞拍攝福音電影。

此外，前晚舉行的《星光熠熠耀保良》陣容鼎盛，陳偉霆、賭王何鴻燊四太梁安琪等出席，而何鴻燊博士基金會捐款100萬港元，四太則捐款230萬港元，當晚最矚目的環節非應屆港姐三甲穿七彩舞衣表演高難度絲帶舞莫屬，有中國舞蹈底子的黃心穎表現最標青，她說：「最尾要單腳倒吊嗰下最難，我練嗰陣Chok到隻腳瘀晒。」而三位港姐的舞衣設計像是參考80年代的健身衣，令三人的「車胎」、「象腿」及「豪華臀」現形。陳偉霆受訪時表示中秋節要工作，故未能與女友蔡卓妍（阿Sa）團圓，問到最近為何不清楚雙方的事情時，他說：「想少提感情事，我哋冇事，唔使擔心。」