城城愛駒首戰Win

榮升馬主的天王郭富城，愛駒「愛的呼喚」昨日首度出戰便奪標，令他初嘗拉頭馬滋味！雖然女友熊黛林未有親身撐場，但仍出錢落注支持，更自爆為愛郎開心到大叫！

新任馬主郭富城的愛駒「愛的呼喚」昨日在沙田馬場首度出戰，與陳百祥的「莫己若」在第6場對壘。首度以馬主身份現身沙圈的城城，以黑西裝配黑超造型示人，又型又Sharp，而好友張智霖、沈嘉偉及太太邱淑貞亦有入場支持。

賽前次熱門

未知是否受城城的號召力影響，賽前一直屬半冷門的「愛的呼喚」，臨開跑前獲馬迷瘋狂「落飛」，賠率由6倍急升至4.2倍，變成次熱門，最終更不負眾望，憑凌厲後勁跑出響頭炮！全程留在主席房觀戰的城城，至拉頭馬時才受訪，並坦言心情極度緊張：「個心卜卜跳，好似個仔去比賽咁！」他表示即使表演及拍戲亦不害怕，但愛駒出戰卻喚起這種久違的感覺：「最後二百米，個心砰嘭咁跳，衝線太強，好開心同驚喜，冇諗過會贏！」

問到未能與熊黛林（Lynn）一同拉頭馬會否遺憾，城城說：「唔緊要，今次唔多有信心，如果知嘅，會叫埋公司同事嚟。（佢落注支持你？）咁咪好囉！」記者其後聯絡Lynn，她自爆一直透過電視直播隔空支持，並投注了200元，當「愛的呼喚」以首名衝線時，她即開心到大叫！

而Lynn前晚在珠寶活動上已事先張揚不會入馬場：「隻馬第一次出賽，佢先係主角，我想你哋影隻馬多啲。」對於被指一身珠光寶氣打扮似出嫁，她笑說：「希望有期啦！（度吓！）要有人同我度先得。」談及中秋佳節，她表示不會到澳門欣賞男友的演唱會，問到會否去城城家賞月，她說：「我屋企個景靚過佢。（去過佢屋企？）話冇去過都冇人信啦！」