待嫁Yumiko逃「出軌」門關：確係有機會同其他演員撻着

緣分天注定！曾揚言沒想過會結婚的鄭希怡（Yumiko），六月底在布吉失足墮坡致頸骨移位，遭逢巨劫卻因禍得福，令她意識到男友的「好」，感悟幸福要自己爭取，遂宣布下嫁拍拖七年的化妝師男友Andy！Yumiko將一連五日剖白內心世界，一切由「七年之癢」講起……

由初戀到依家，我嘅男友十隻手指數得晒，入行之後只係拍過三次拖，係有圈中人，但唔係拍咗好耐。其實我從來冇諗過有男友可以拍拖超過三年，事關我係處女座，唔係好麻煩，但幾執着，有時令人唔舒服，要同嗰個人相處得舒服先可以一齊。我同Andy（化妝師男友梁學儲）經歷咗七年之癢，咁多年冇嗌大交。

以為男友係「攣」

起初知佢係化妝師，以為佢係攣，因為我識得嘅男化妝師好多都唔係「直」嘅，但後來大家Feel到啲嘢，佢當時打畀我約唱K，好似有啲嘢喎！我對佢都有好感，於是就約會，之後慢慢開始，一拍就七年。

其實愛情係要自己爭取，我問過其他朋友意見，知Andy係好人，就試吓發展，我同佢相處，佢畀好多空間我。雖然佢係化妝師，但我哋公還公、私還私，我搵佢化妝，依然照畀錢，公私分明！以前都知佢對我好，好似六年前發生「東華事件」（表演空中飛人時甩褲），嗰排我唔可以出嚟做嘢，佢冇怨言、冇責備，好似平時一樣。當時佢日日陪我，又買嘢畀我食，喺身邊默默支持我渡過難關。

不眠不休最感動

今次發生意外之後，佢不眠不休照顧我，又經常扶住我，成日氹我開心，明白到患難見真情！今次受傷，我先知自己原來冇咗照顧自己嘅能力，但佢從冇離開過我半步，仲肯照顧一個照顧唔到自己嘅人，我好感動！自從公開戀情同婚訊後，個人安樂咗，我冇諗住隱瞞戀情，只係唔想多講，但今次係開心事（指結婚），值得Share（分享）。我哋頭兩年拍拖，去街都唔敢拖手，始終唔可以畀太多人知，但近年大家接受偶像拍拖，行街開心咗、Free咗，試過喺條街見到啲人，佢哋走嚟恭喜我結婚，嗰刻真係好溫暖！

我記得以前曾經講過自己係一個未必結婚嘅人，以前拍拖起初感覺幾好，但去到相處就易有問題，加上結婚承諾太沉重，因為要學識同另一個人相處一世，緣分天注定，我知道：「係呢個！」未來我哋會分擔工作同家務，責任大咗，雙方有默契。至於生小朋友，暫時未喺計算範圍內，等多兩年先。其實我有啲驚小朋友，有次出席聚會，有十幾個小朋友走嚟走去，不時尖叫，真係有啲怕！哈哈！

自動報到護戀情

入行後自問緋聞唔多，尤其同Andy拍拖後已經零緋聞，有（緋聞）反而唔應該。近年返內地拍劇，確係有機會同其他演員「撻着」，但我會Keep住打電話返香港報到，互報行蹤同傾偈，況且人大咗，冇以前咁好精力，加上今次受傷事件，提醒我唔可以再玩得咁癲，今次係教訓同警惕，但亦見到好多人關心同愛錫自己。至於當年同吳浩康傳緋聞，真係得個傳字，佢當我「兄弟」咋！梗係冇尷尬！我結婚佢都有恭喜我，但我覺得佢要減肥，最好同張致恒兩個互減！至於「龍嫂」呢個名，我唔介意人哋講，冇同成龍大哥有尷尬，見面都會攞呢個名「自嘲」。

（明日待續）

Profile

姓名：鄭希怡（Yumiko）

生日：1981年9月6日

出生地點：上海

入行經過：2000年簽約英皇，2002年與劉思惠及蔣雅文組成「3T」，推出唱片《少女蝶》，由於表現突出，及後單飛發展，並推出了11張專輯，近年專注內地拍劇吸金。

代表作：

歌曲：《相對濕度》、《舞吧舞吧》、《有心人》、《阿拉伯市場》等

電影：《魂魄唔齊》、《消失的子彈》、《長恨歌》等

電視劇：（香港）《秀才愛上兵》、（內地）《無懈可擊之美女如雲》、《盛女的黃金時代》等

獎項：四奪新城勁爆跳舞歌曲獎

口述：鄭希怡

筆錄：專案組