舒淇馮德倫好事近

情路兜轉的舒淇，年初被踢爆與馮德倫成功翻撻！如沐春風的她現身米蘭時裝周，穿上五吋高跟鞋出場險「仆直」！談及馮德倫時，她將對方升格為「非常非常非常好嘅朋友」，力證男方非一般地位！

舒淇入行以來，緋聞男友如走馬燈，可惜真命天子尚未現身！直至今年4月，本報記者目擊她與《美少年之戀》舊拍檔馮德倫情侶裝夜蒲中環，數月後再被踢爆密遊東京。「鐵證」如山，兩位當事人態度開始軟化，上月適逢馮德倫38歲生日，舒淇不避嫌在微博以「Dear」稱呼對方。

「淇倫戀」女主角舒淇前日現身米蘭出席La Posteria舉行的《Jimmy Choo 2013春夏預展》，她穿上五吋金色高跟涼鞋，甫出場疑失重心，險仆倒人前！不久，她又發現高跟涼鞋腳踭位置冇拉拉鏈，遂坐下來拉，助手見她拉不上便跪下幫手，可惜拉鏈被卡着，男設計師Simon Holloway見狀也跪下來出手相助！突然獲眾人「下跪」行禮，舒淇一臉尷尬，惟有伸脷扮可愛緩和氣氛！

恨有男人呵護

上月舒淇出席活動時否認馮德倫已求婚，並口硬以「好朋友」形容對方，但前日她的手上竟戴上卡通戒指，恨嫁之心不言而喻！原來戒指是好友安以軒送給她的生日禮物，問到有否期待人生另一階段？她說：「我怕變得太幼稚，到時唔知買嘢畀自己定個女，如果係仔會唔會打扮成女仔。（想唔想有男人呵護你？）如果有咁幸運，當然好！」再追問馮德倫是否其Mr. Right時，她沒有否認，只射歪波說：「佢係我非常非常非常好嘅朋友！（冇可能發展？）係好朋友！」

提到她有份演出、馮德倫執導的電影《太極》將上映，她卻屢次缺席宣傳，她表示因為很忙，絕非怕跟男方同場：「我喺呢個圈打滾咗十幾年，都習慣，唔會避忌。」她透露將為拍攝電影《聶隱娘》到北京練功：「打女唔易做，腰痠背痛，根本唔係人做！」她又自爆此行有「艷遇」：「喺大教堂跑步時有個男仔揸住我隻手，放啲白鴿飼料喺我手上餵白鴿，好驚，覺得意大利人太熱情！」另一邊廂的馮德倫昨日在北京出席《太極》首映禮，他笑言因妒忌男主角彭于晏比他帥，差點將對方的鏡頭調校成青色，但遭阻止。