鄧伊玲住家菜偷心

男人有誰不愛吃住家菜？有誰不想找個入得廚房的女伴？「E Cup教主」鄧伊玲正正因此而自小跟母親入廚，下廚經驗豐富的她更是廚藝高手，揚言要用食物綁實男人，單身的她因未有異性能令她出手而大感可惜！

圈中不少女星都入得廚房，出得廳堂，平日愛在家中玩煮飯仔，陳靜師妹「E Cup教主」鄧伊玲（阿旦）除性感形象引死宅男外，原來她睇得又煮得，閒時會走入廚房煮番幾味招呼親友，她說：「如果平時唔使工作，都會約埋成班朋友嚟我屋企，一齊煮幾味家常菜食，佢哋都食過翻尋味，成日問幾時可以再上嚟食。」

濃味自戀

這位o靚模界女廚神雖然年紀輕輕，但入廚已近10年，四餸一湯完全難不倒她，她透露一身好廚藝乃師承母親：「好細個已經入廚房跟媽咪煮家常菜，其實真係唔記得確實喺幾多歲，但中學時期已經開始整甜品或蛋糕畀朋友食。」除了家常菜及甜品外，阿旦這位烹飪達人還識煲靚湯，廚藝戰鬥力驚人，她笑說：「會煮飯畀自己食，但一個人多數唔係點煮，反而會煲湯飲，但好唔好食就各人有各人睇法，我有啲朋友會嫌我煮得較濃味，但我就好鍾意食！」

烹飪可說是阿旦的興趣，也是其必殺技，她笑說：「阿媽之前話煮嘢食係要留住男人個胃，作為女生外在點靚都好，都要有內在美，所以好細個已經學煮嘢食，哈哈！洗碗都要。」話就話要用食物綁住男人，但單身的阿旦卻未有異性可到其香閨一嘗其手勢，她笑說：「哈哈，男仔朋友真係唔係咁容易可以食到我煮嘅嘢，依家仲未有人可以去我屋企食，都幾可惜，所以要再努力啲搵吓，但普通出街食飯當然有啦！」

自Cook自足

訪問當日，阿旦用了約30分鐘炮製了三道菜，雖然製作簡單，但全是其至愛的菜式：「雞翼同蝦Cocktail好方便，平時我最鍾意食，有時喺屋企肚餓都會煮吓呢啲食，得一個人煮太多嘢食會食唔晒，浪費唔係咁好！」

後記：靠「煮」撈過界

模特兒出身的阿旦，今年踩入收費電視做娛樂主播，其後更因廚藝了得而擔任飲食節目主持，除食盡美食外，更可與靚仔廚神合作，難怪她開心的說：「依家同法國廚師主持節目，佢教咗我好多嘢，我覺得識煮嘢食嘅男仔好吸引，但佢結咗婚同生埋仔，完全唔會對佢有任何期望！」