蕉腩騎呢亞生不為選美只求入行

亞洲先生首輪面試正式開波，可惜慘變騎呢集中營，不少參賽者更似乎將面試變成「星爺招募演員」博入行。少髮凸腩武術教練及「晒蕉」阿叔最頂癮！

無綫今年停辦《香港先生》，令亞視的《亞洲先生》獨攬城中筍男。可惜全港靚仔似乎瞓晒覺，昨日參與首輪面試的24位參賽者，騎呢兵團多得可為周星馳提供一打半的「如花」，卻因而更凸顯超班的參賽者。

貌似巴塞中場法比加斯的Bruno來自羅馬尼亞，唏噓鬚根加上陽光笑容反差雖大，但勝在夠殺，他穿上三角褲露出六舊腹肌，睇到台下評判姚嘉雯及楊玉梅o依嘩鬼叫，他還即席表演性感舞步，以首輪質素而言，真的很難被叮！而移居來港的健身教練黃集鋒，曾於內地當海軍，脫去上衣後渾身是肌，他即場用唔鹹唔淡廣東話勁晒當軍人的辛苦及自誇健身有幾勁，信心十足，他受訪時表示為選「亞生」準備了兩年：「我身高唔算高，勝在身形線條靚同平均，希望藉今次機會入行！」

亞視高層：質素冇問題

騎呢充斥面試場的情況下，不少參賽者更擺到明抱「搵工」心態，望靠騎呢殺入娛樂圈闖新血路。不少參賽者不慎露毛，其中上半身塗粉厚過女士俏面的梁漢宇，表演瑜伽時更疑似露蛋。另外底褲潮着的廖鳳禧則似瘦骨仙；陳曉磊更是「亞生」常客，屢敗屢戰。但講騎呢之最，頭髮稀疏過《少林足球》二師兄的吳華星認真堅，其大肚Dum亦相當突出，當他一心表演功夫時，卻因時間關係被請離場，事後他說：「我係嚟當搵工，因為我識跳舞、唱歌、結他同打功夫！可惜唔畀我表演。」而在網絡靠騎呢出位的另一阿叔鄧簡文，更拿紙卡剪成蕉狀貼於兩點前，又拿真蕉玩雙節棍，真係邊個夠佢玩？

亞視高級副總裁葉家寶說：「今年有200幾人報名，因為香港先生（無綫）停辦，所以質素應該冇問題，今日只係首輪，仲有其他賽區未揀。希望最後可以由50人選到30人參加決賽。」據知，亞視至今仍未落實會否有日本的參賽者加入最後30強。