內地女星獻殷勤 鄭嘉穎：好正常

鄭嘉穎、周秀娜及元華昨日到蘇州出席《葉問全國媒體見面會》，嘉穎與劇中太太、內地演員韓雪不時咬耳仔，韓雪更揚言為嘉穎一改被動作風，主動買零食獻殷勤，被笑艷福不淺的嘉穎即說：「拍嘢溝通好正常，我都有買嘢畀工作人員食。（同周秀娜有咀戲？）臨時加，都唔知點解要拍。八百場戲有二百場打，收工仲要練詠春同睇劇本，拍戲以來最辛苦。（驚同甄子丹比較？）冇得比，小弟由零開始。」

周秀娜以皮裙封胸Look示人，坐下時不慎露底，她說：「同嘉穎咀冇尷尬，有場戲講我想刺激癱咗嘅宋洋（男演員）起身，喺佢面前大露背，佢表現到好想起，拍時我冇尷尬，反而佢流晒汗。（你唔知佢有冇起？）哈哈，呢場戲真係幾激！」對於香港計劃對偷拍裙底者加重刑罰，她認為能起警惕作用。

嘉穎獲專人開路行紅地氈，真架勢！

娜姐與內地演員韓雪（右）甚好傾。

元華與娜姐結伴到場，期間更獲戲迷揀來握手，人氣勁過娜姐。

劇中嘉穎有激吻戲，娜姐則繼續「肉」緊演出。