細佬豪龍小登科 桃色栢芝喊爆

張栢芝細佬張豪龍雙喜臨門，昨日迎娶大肚化妝師女友周紫雯，婚宴花費僅約十萬元。栢芝一身桃紅色西裝帶同兩子到賀，席間獻唱見證姊弟情深，致辭時更感動得喊唔停。

張栢芝與細佬張豪龍感情甚佳，昨日32歲的豪龍於康樂園鄉村俱樂部舉行婚禮，迎娶比他年長五個月、懷有數月身孕的女友周紫雯。近年開設滑水學校的豪龍極為低調，為照顧大肚老婆，連婚禮亦未有大事鋪張，花費約十萬元於俱樂部泳池邊舉行。

昨晨十一時半，穿桃紅色西裝、打粉紅呔的栢芝帶同兩名穿禮服的兒子，與家姐戴碧芝及其女兒到賀。右手抱Quintus、左手拖Lucas的栢芝見記者即任影唔嬲，但Lucas則搞笑不時擰歪面。至於早前捲入官司的父親鬍鬚勇，與栢芝媽等親友亦一早到場打點。

新郎豪龍與太太於早上十時半乘房車抵達，據悉婚禮派對要求保密，賓客不能將婚禮情況上載到互聯網。婚宴期間，栢芝獻唱多首歌曲，分享姊弟情時感觸喊爆：「我好錫呢個細佬，佢好生性！」又表示有親手整結婚禮物，還透露昨日最難得是能與同父同母的弟弟及父母一家五口聚首。栢芝媽接受電話訪問則說：「等咗好多年都係等今日，每一部分都感動！」

「全家嘅愛」贈弟婦

至昨午二時許，噴了一頭金粉、穿西裝打金色煲呔襯金色鞋襪的豪龍，出來接受記者訪問。當栢芝向記者說：「辛苦晒！」豪龍只不停說：「好開心！好開心！」栢芝透露婚禮詳情：「有好正式嘅簽字儀式，好正式o架！跟住就播新郎哥細個嘅片，然後係同佢老婆相識經過，仲播我個仔唱歌跳舞啲片，後面好多小朋友，跟住大家唱歌表演，係一個婚禮Party。」問到有甚麼愛的宣言，豪龍仍只說：「好開心！」栢芝忍不住代答：「佢好緊張呀！（送咩畀弟婦？）弟婦係咩呀？即係佢老婆？送晒我哋全家嘅愛，你睇我哋造型就知我哋好時尚，冇嗰啲豬牌、龍鳳，我諗送最大嘅支持同愛囉！」問到兩名兒子是否擔任花仔，栢芝說：「唔算，Lucas着咗西裝，Quintus入到去冇耐就瞓咗。」