Rain帶新歡返閨 歎完私房菜見家長

有內地掘金女王之稱的李彩華（Rain），早前宣布失戀，但已火速另結新歡，跟「肥版田亮」歎日式私房菜，新歡不僅討得Rain歡心，還做埋柴可夫接送李媽媽，大行外母政策，難怪Rain價值千萬的香閨都讓男友任入。

於6月宣布甩拖的Rain，已收拾心情投入工作，雖然情傷初愈，但她已火速搭上新歡，日前本報收到讀者報料，目睹Rain跟一名男子身在銅鑼灣一間樓上日式私房菜撐枱腳，記者趕到現場看見他倆落樓，男士貌似肥版「跳水王子田亮」，兩人在街上有默契地左右分開，男子先上車等待，Rain就進入化妝店購物，其後急步上車絕塵而去。

Rain的新歡不僅細心接送，對李媽媽同樣照顧周到，原來李媽媽就在附近兩條街的一幢大廈門外等候，Rain的新男友順道接李媽媽登車後，便駕車駛往Rain位於渣甸山的豪宅。抵埗後Rain與新男友前後腳步入大廈閘口，能夠登堂直入Rain的香閨，可見兩人關係密切。

識咗好耐

根據Rain新歡的車輛登記資料，顯示車主姓鍾，報稱住址是堅尼地城，房車車價約50萬港元。在內地拍劇的Rain受訪時說：「嗰晚約咗個好兄弟食飯，同佢識咗好耐，唔係拍拖，100%唔係，大家千祈唔好誤會，唔好阻住我啲桃花。（已經見家長？）食完飯佢車我，然後接埋我阿媽去我間新屋，間屋仲裝修緊，我想去睇吓裝修咋，佢放低我哋兩個就走咗。」