王浩信約苟芸慧過中秋
「宅男女神」苟芸慧昨日穿喱士裙，與王浩信到將軍澳出席《藝術Lace花燈迎中秋》，苟姑娘表示中秋無法團圓：「要開工，來香港三年都係自己過！（覺得好Dry？）OK啦，同工作人員過囉！（緋聞太多嚇退追求者？）唔覺，我做嘢還做嘢，行得正企得正。」王浩信則大方邀約苟姑娘：「苟芸慧中秋得閒上嚟我屋企飲湯、食月餅，我老婆（陳自瑤）煲湯有一手。（唔驚傳緋聞？）驚！話晒『宅男女神』，我驚講錯嘢刺激到佢Fans。（你唔敢單獨約女仔？）只會私下約單身男士，好多時仲同老婆一齊去，至於其他會好小心。」
