鍾采羲恨畫裸男

別看「爆E超蓮」鍾采羲平日非常好動，原來她也有文靜的一面，在外國留學的她自小醉心畫畫，人像、蔬果等她幾乎樣樣畫齊，卻因未畫過裸男而大嘆可惜，她笑言若有型男自動獻身，必再重拾已放下兩年多的畫筆，一展藝術天分！

娛樂圈可說是臥虎藏龍之地，不少藝人大多有一技之長，而「爆E超蓮」鍾采羲（Iris）便是一位藝術家，她未入行前就是靠一支畫筆走天涯，在外國留學的她原來是藝術學院的高材生，她說︰「中學時我係讀Art同Fashion Design，去到大學就入咗藝術學院，返嚟香港都係做關於Design嘅嘢。」

後悔走堂

Iris自小就拿着畫筆四圍畫，她表示對畫還多過對家人，每日回到家便埋頭苦幹不斷畫，沉迷到有時連飯都不吃，非常誇張！提到以前的畫畫生活，Iris說：「小學嗰時已經要畫吓生果蔬菜，中學就開始畫自己個樣，外國比較Freestyle，你想畫乜都得，真係好輕鬆，好好玩！」雖然Iris已差不多畫盡各種各樣的事物，卻未曾畫過裸男裸女，令她大感可惜：「冇畫過裸男，好想試吓，如果依家有個靚仔畀我畫嘅話，都會拎番起支畫筆，真係愈講愈有興趣！我諗我唔會掛住望個模特兒，唔記得畫自己幅畫，我都有專業態度！」至於裸女，她慨嘆年少時因貪玩走堂而放棄了這個難得的機會：「有堂請咗個裸女返嚟畫，但我嗰時好壞，Skip（走）咗嗰堂冇去到。」

正正因為貪玩，Iris做了設計工作一年便放棄了，在誤打誤撞下入行做模特兒，她說︰「覺得做設計其實都幾悶，所以就轉行，入行做咗Model。」不過，Iris坦言會的起心肝重拾畫筆：「會再拎畫筆，以後都會，希望畫多啲畫去拍賣做善事，但依家會努力模特兒事業先，以前畫筆係我嘅職業，但依家係興趣，因為都畫咗成10年，想做唔同嘅嘢多啲。」

畫中有「話」

工欲善其事，必先利其器。Iris認為要畫一幅完美的畫，購買價錢較貴的畫筆及素描用的鉛筆是必須的，因順滑及流暢度皆有所保證，筆芯堅硬度高不易斷，且不易甩色。畫簿及畫紙也要講求質素，因會影響畫質及呈現的效果。而繪畫時，最好先用鉛筆輕輕勾勒，然後才上色會較好，亦可先以相機拍下所畫的景物，然後才慢慢臨摹，繪畫時就更得心應手。Iris表示絕不可因貪方便而把畫作摺疊或捲起，以免甩色及疊色。

後記：「學」吸金

畫得靚唔靚其實見仁見智，但相信Iris的作品早已得到肯定，早在她讀書時，已有人出高價買下其作品，她說︰「其實自己唔覺得好特別，因為唔係畫得太靚，但都幾有滿足感，價錢亦唔錯，因為當時始終係學生。」看來Iris都可開班授徒呢！