孫耀威重傷瞞得就瞞

孫耀威（Eric）與家人相處融洽，但為免家人擔心，他往往報喜不報憂。當年在外地拍劇遇意外受重傷的Eric，瞞住家人悄悄回港療傷，待出院後才告知雙親。

口述：孫耀威　筆錄：專案組

屋企有父母同兩個妹妹，我係家中大仔，一家人關係密切，但由細到大都習慣報喜不報憂，有乜唔開心都好少講，因為唔想佢哋擔心。雖然有啲消息見咗報，但我都會呃佢哋，記得10幾年前喺台灣拍劇集《懷玉公主》，當時我唔識騎馬，拍嗰時有閃光燈，加埋煙花炮仗嚇親隻馬，結果意外受傷，隻馬個Pat Pat撞到我個肺，好彩身後有排櫈卸咗道力，但都輕微內出血，助手即刻送我去醫院，第二日坐住輪椅搭飛機返香港，再入醫院，總共住咗三日，出院先打畀媽咪話佢知我發生意外差啲死。

飲茶爭畀錢

除咗拍劇發生意外冇話畀媽咪聽之外，就連拍拖都冇同媽咪講，但佢其實好想見到我有個女人喺隔籬，想我成家立室。至於老竇都好錫我，但仔同老竇嘅關係心照啦，佢哋年紀大咗，但好彩依家智能電話有「聊天室」功能，我逼佢哋兩個用呢款電話，學識打中文字同傳相，雖然大家未必成日見，但一星期點都會飲餐茶，次次出嚟食飯爭崩頭埋單，好感恩有咁好嘅家庭。幾時到我組織家庭？到我想生BB先啦，到時就會話畀大家知。（明日待續）