霆鋒驚栢芝送鐘

上月底度過32歲生日的謝霆鋒前晚出席英皇電影《消失的子彈》首映，他透露還未收到張栢芝的禮物，但表示即使栢芝冇表示也沒問題。

謝霆鋒、劉青雲及鄭希怡前晚出席英皇新片《消失的子彈》首映禮，霆鋒父母謝賢及狄波拉、青雲太太郭藹明、薛凱琪、陳法拉及孫佳君等均有到場支持。霆鋒與青雲更別出心裁乘坐人力車進場，配合《消》片中的懷舊時代背景。談到張栢芝早前被拍到選購手錶，問霆鋒是否收到栢芝送的生日禮物？他說：「隻錶唔係買畀我，好彩佢唔係畀人影到買鐘，畀人話『栢芝送霆鋒鐘』就唔好！唔使咩表示，我唔着重過節日，生日喺北京做嘢，都冇同對仔慶祝。（離婚輕鬆咗？解開心結？）我不嬲冇心結，為對仔好，大家努力做嘢，冇必要搞到唔開心。Lucas開學OK，Quintus返Play Group，佢想跟哥哥返學，但呢期多病菌，老師唔贊成佢周圍去。」

青雲讚有默契

至於青雲則說：「套戲好睇，講要犧牲好多先可以維護正義。（霆鋒話同你合作講埋唔夠30句？）我要打醒十六分精神應付導演。我17歲時第一次見霆鋒，佢好細個，但同佢合作默契唔錯。」他又指數月前已知好友張達明患病：「有通電話，但冇探佢，畀佢休息，都係睇報紙至知佢病情，康復咪好，開開心心。」