孫耀威星光下的傻仔

孫耀威（Eric）的事業經歷不少起跌，雪藏、解約、得罪人統統都試過，全因他的想法絕不「正路」，甚至可用「騎呢」來形容，想做就去做，結果遭取笑是傻仔。

好多人認為我嘅演藝決定係唔正路、好錯，但我就係一個咁樣嘅人，想做乜就去做！尤其係做呢行，要好享受先行得到。我一出道就出唱片，之後走去拍戲，啲人已經覺得好傻；拍戲拍得好好哋，又突然返嚟出廣東唱片；個個都想賺「人仔」時，但我埋首去創作，無時無刻都諗曲作詞。

記得第一份唱片約完咗，順理成章簽第二份真正賺錢合約，嗰時唱到傻傻哋，19歲仔名利雙收，一切嚟得太快，但根本唔識Handle！五年後約滿，喺香港出完精選碟，仲賣咗10萬張，當時心諗：「唓！我唔續約搵另一間，一定可以攞好正嘅合約。」甚至想過唔唱去美國繼續升學。

與經理人反面

人生第一個事業低潮，就係嗰時畀公司雪藏，跟住想簽其他唱片公司又遇阻滯！嗰時已經20幾歲，再發現原來我賺嘅錢好快冇晒，唔掂喎！於是走去拍戲，第一部電視劇《懷玉公主》，好彩台灣同內地破晒當年收視，令我成功轉型做演員，過程學到好多嘢。不過，拍戲時間好長，至少幾個月，遇到低潮要自己處理，好似拍戲時有惡勢力介入，唔畀片酬都要繼續拍，呢啲點滴遇過好多！其實幸運唔係必然，努力未必有回報，但唔努力一定死，慶幸我經歷過，最後積極面對。

最低潮畀人包？我又好「失敗」，冇人包過我，點解呢？我從來唔向錢低頭，懶有骨氣懶清高，所以成日得罪人。2007年，我返港做廣東唱片，台灣經理人同我反面，話咁辛苦喺內地捧我做一線演員，部部戲做男主角，知唔知幾多人虎視眈眈，你走番去出廣東唱片？你冇嘢嘛！

對演藝感厭倦

站喺經濟立場，全世界覺得我係傻仔，但我話畀你知，若然我當時仲喺內地拍劇，我會對演藝工作厭倦，一個冇火藝人，唔使人哋淘汰自己，會自我淘汰。之後我決定做廣東唱片，個人醒神啲，唔好用一個好叻嘅經理人立場去規劃我。我依家腦中有好多計劃，甚至覺得呢啲Ideas會冇公司Buy，但我係咁樣嘅人。

大學時修讀電腦工程，同我入娛樂圈基本上冇關係，我不嬲選擇好騎呢。當年揀呢科純粹唔使讀書，只係對住部機寫程式。我知我冇可能返朝九晚五，呢行雖然好辛苦，但好Enjoy。依家發覺讀電腦對我好大幫助，因為做歌用得番，識得點寫程式。依家做音樂比以前平好多，十幾年前開始學寫歌，買器材要10幾萬，依家用幾千蚊就可以寫歌，所以我會鼓勵年輕人嘗試。（明日待續）

口述：孫耀威　

筆錄：專案組