孫耀威晒冷愛Macy

入行近20年的孫耀威（Eric），星途及情路絕非暢順，曾因舊愛有第三者，令Eric情緒崩潰，萌輕生念頭，險永不翻身，幸有信仰幫助他重生，現時更與女友陳美詩（Macy）相當恩愛！Eric將一連五天剖白鮮為人知的一面，一切從「谷底」講起……

我出道時星途幾順利，但其實我都有黑暗面，試過接近抑鬱症，甚至想過死。當年喺內地戲接戲，賺咗好多錢，當時女友係圈外人，但我一年裏面有十一個半月唔喺香港，變咗Cyber男友，仲發現對方有第三者。我以為賺錢買樓就係成功，但心靈好空虛，連唯一寄託嘅女朋友都冇埋，同劇演員好多係第一次合作，完全冇朋友傾偈，自己喪喊同胡思亂想，好崩潰。我係基督徒，唔可以自殺，但我試過望住天花板，心諗不如跌落嚟壓死我，當時我不停祈禱，祈到瞓喺地下，突然間有股力量慢慢扶我起身，好快跳番出嚟。

「大個仔」先結婚

其實《谷底》呢首歌係講身邊好多人對自己指指點點，寫咗好多鮮為人知嘅軟弱、誘惑同放縱經歷。我仲作咗首好Sweet嘅情歌叫《I Do》，可以話寫畀我女友（Macy），依家嘅我唔介意畀人知我哋好Sweet，如果有一日要結婚生仔，都會照我意願做，但我仲係大細路，養小朋友我驚會唔記得餵佢食飯，等我唔似大細路時，就做呢件事（結婚）。

舊年Macy發生意外，我透過兩篇好短嘅微博講番件事，令外界更清楚我哋兩個關係。我依家嘅愛情觀係「晒冷」，讀書時已經去得好盡，當正另一半係終身伴侶，但經歷過好多次失敗，四、五年前我諗自己會搵唔到真愛，但呢幾年又回復「晒冷」，唔好用前度犯嘅錯誤懲罰現在嘅伴侶，咁樣好唔公平，每段感情要Reset to Zero。

但我對Macy有啲內疚，我同佢嘅關係到咗連情人節都唔送禮物嘅階段，但佢對我好好，當我匿埋喺房寫歌、喺Studio錄音時，佢都會陪我，半夜三更又買消夜畀我食，佢又會啟發我靈感。我揀女友冇刻意要大眼、長髮同溫柔，但冇人想老婆唔靚啩？我鍾意公主型，當然內在美都好重要，但愈大個愈發現，內在美同外在美係「七三比例」，如果老婆好似李嘉欣咁靚，你日日望住佢都有厭嘅一日。

再見不是朋友

我同酒井法子冇拍過拖，當年唱片公司好想撮合我哋，但我冇心動過。至於同楊秀惠都冇尷尬，因為冇再見同冇乜聯絡，有啲Ex（前度）可以做朋友，有啲Ex真係未必做到朋友。有冇試過同Fans撻着？咁又冇喎！但我啲Fans好可愛，因為到我今時今日拍拖，佢哋都係唔贊成，仲會喺網上留言鬧我女友。至於我係咪大男人？以前係嘅，依家就「中佬」囉，企喺人哋立場去諗，會冇咁多拗撬。

（明日待續）

Profile

姓名：孫耀威（Eric）

出生日期：1973年1月3日（39歲）

入行經過：大學畢業的他於1993年獲台灣唱片公司垂青，推出首張個人專輯，大受歡迎，人氣直逼林志穎，翌年以「香港小天王」之名闖香港樂壇，及後進軍日本市場，成績理想。

口述：孫耀威

筆錄：專案組