G.E.M.怪雞舞谷騷

韓國男歌手Psy憑《江南Style》的騎呢舞步而熱爆全球，吸引各地藝人潮學，有「扮嘢癮」的鄧紫棋（G.E.M.）亦自爆狂煲對方騎呢舞，有意搬上明年的紅館騷冧Fans！

韓國男歌手Psy其貌不揚，有個大肚腩兼造型古怪，卻偏偏憑一首《江南Style》紅爆全球樂壇，連加拿大小天王Justin Bieber亦睇中他簽約旗下唱片公司，日前有份於美國《2012年MTV音樂錄影帶頒獎禮》演出，氣勢更勝當年憑騎呢舞姿出位的孔慶翔多多聲！這股《江南》熱亦吹到香港。

粉絲一早建議

向來具有模仿天分的G.E.M.亦諗定學對方的騎呢舞，於明年再踏紅館時表演冧Fans！她直言有留意Psy的動向，還狂煲《江》的MV，最愛他的大肚腩，她說：「佢真係好正！我每次睇MV都勁笑，個樣超搞笑！（覺得佢似邊個？）唔覺得佢似任何一個人，好獨特！」將於明年四月在紅館開騷的她直言心郁郁跳該騎呢舞：「其實一早有Fans提議。（唔覺佢舞姿好騎呢？）唔覺！覺得佢跳得好似公雞！如果有Fans投票想我跳，我都一定會跳，但細節同構思依家仲諗緊，如果到時呢首歌嘅舞姿夾到個騷嘅主題，我都不妨跳畀大家睇，搞笑之嘛，我根本就係搞開笑！」

另外，向來緊貼潮流的「福祿壽」亦虎視眈眈，身在加拿大的李思捷接受訪問時直認，福祿壽有意模仿《江》的MV娛賓，並笑言阮兆祥是扮演Psy的不二人選：「佢身形啱！其實呢隻歌我個幾月前已有留意，覺得好出位，好少有咁身形嘅人可以跳到咁活躍嘅舞步。其實隻舞難度唔高，係個創意犀利，我最鍾意手搭手然後Fing吓Fing吓嗰個動作。」

祖藍：搞笑典範

「福祿壽」王祖藍亦讚Psy夠搞笑：「佢好叻，將有型同搞笑擺埋一齊，不落俗套，堪稱搞笑嘅典範。（最鍾意佢邊部分？）騎馬！係招牌動作，全世界可以跟住跳，冇難度又夠搞笑。（福祿壽真係會扮佢？）有啲難搞喎！因為佢本身太好笑，好難做得比佢更好笑！我覺得應該學習佢嘅精神。」