關楚耀慈父潮媽

關楚耀（Kelvin）的父親關維麟是資深音樂人，「契爺」又是譚詠麟，Kelvin可謂在音樂世家成長。他表示閒時愛與父親「嗒兩杯」，而母親則會毫不留情地批評他的衣着和儀容。

由細到大我都係同屋企人住，算係喺溫室中成長，同家人以朋友方式相處。雖然爹哋係著名監製，但我又冇乜壓力，可能我個人比較簡單，依家工作心態就係想做就做，會去得盡啲。雖然我喺大人堆中成長，但又唔會冇咗童真，我依家仲係好低能。的確細細個已經見過好多當紅歌手，好似黎明、阿倫等，但我又唔會話覺得好型、好威，我只不過係一個小歌迷，當年亦冇追星，因為我當時鍾意木村拓哉，屋企貼晒佢啲海報，仲煲埋日劇。

今年因為工作忙，少咗時間同家人見面，但父母都好明白，佢哋放手畀我做自己想做嘅嘢。三年前發生嗰件事（日本涉毒被拘留），佢哋冇叫我唔好做娛樂圈，仲好撐我，反而係自己想過放棄，但我已經令爹哋失望一次，唔想再令佢失望多一次，希望畀佢感受到我對工作嘅誠意。

嗒兩杯畀意見

之前我喺日本做嘢，買咗啲酒返嚟，終於有時間同爹哋坐低飲番兩杯傾偈，佢係一個好低調嘅人，好少去電影首映或者音樂會，但唔緊要，因為之前我開騷，佢會畀意見我，係我最強嘅幕後軍師。

媽咪就成日彈我衣着，因為佢係潮媽，對儀容同着衫好有要求，比如我試過有條褲三日着兩次宣傳，佢見到即刻話：「又係呢條褲？唔好再着啦！」好多細微嘢佢都提醒我，比如成日都叫我掹眉，咁我呢期又愛美容，要有健康皮膚，所以都聽媽咪話掹啦！（明日待續）

口述：關楚耀　

筆錄：專案組