陳嘉桓 周麗淇邊個啱口味?

10+與30+年齡相差多年,愛情觀理應南轅北轍,然而經過娛樂圈的洗禮後,同樣學懂讓愛Let it be!19歲的陳嘉桓被多場風花雪月的事折騰心靈;逾30歲的周麗淇千里姻緣兜錯圈,幸沒有鑽牛角尖!

年少多好,出道兩年的陳嘉桓(Rose)芳齡19歲,挾着年輕貌美兼滿有魄力的本錢入行,大可任性地亂闖找出方向,然後從跌碰中學習,從學習中成長!身為葉準徒弟冼國林徒弟的Rose,個性剛柔並濟,她愛家人、愛朋友,更期待愛情,滿腦子愛情狂想曲的她,直言遇到好男人會隨時閃婚閃生,不過一切只限十年後!

愛情次要

跟90後談論愛情,以為個個喜愛夜蒲,事實上當然也有例外!拍過兩次拖的Rose,為了事業自願放棄愛情,縱然曾想過早婚這女兒心事:「相信個個女仔細個都想早啲結婚,以前我都想廿三、四歲結婚。」但自從去年換了成人身份證後,反而令她對婚姻卻步:「做咗藝人好似入咗個大人世界咁,思想好快變成大人,唔再細路女,明白呢啲嘢冇咁快實現,依家算係黃金期,唔可以錯過,愛情同麵包,呢一刻我會揀麵包先!」

預咗離婚

Rose將婚期押後到30歲,這10年可以拍拖,但結婚免問:「依家好多女仔都唔會咁早結婚,反而鍾意做女強人,我心態都一樣,覺得有事業係好事,就算冇拖拍都唔緊要,做人最緊要有方向,同埋要有穩定經濟基礎。將來會唔會閃婚?我唔介意o架!結婚係開心事,可能嗰刻真係被感動就嫁o架喇!」

不過大概因為Rose自小父母離異,寄養在姨婆家中,與弟弟相依為命,令她性格偏向悲觀,連結婚也會預埋離婚:「我嘅感情世界係要相處好耐先拍拖,要知道對方優點同缺點先可以一齊,從來冇諗過愛情係一生一世,就算結婚我都會好現實咁諗,結婚唔代表長久,如果將來結婚,都預咗可能會遇到一段不良關係而離婚。」她謂若然有小三介入,可能會原諒對方:「我會先搵方法解決,希望佢會變番好!如果冇得救就會分開,不過就算唔分手,個心應該會有條刺!」

食硬好男人!

其實Rose對愛情不必太悲觀,這個世界仍有好多好男人,何況她外表和性格皆討好,簡直人見人愛、車見車載,現時單身的她希望找個投契好男人,條件如下:「當然人品要好啦!要鍾意小動物,至於外形又唔使好靚仔,不過要身形高大,始終自己都高,哈哈!」各位好男人們,收到嗎?

對周麗淇(Niki)來說,鄭嘉穎就似咖啡因,搣了4年搣極都搣唔甩,並非Niki不想戒,而是別人逼你喝,戒了又喝、喝了又戒,一個惡性循環!近日又傳Niki翻撻鄭視帝,她說:「天知地知將來嘅事,不過緋聞傳得多,真係會悶o架!」韶華一去不返,Niki失去的光陰太多,與其流血不止,倒不讓愛「Let it be」!她說:「我覺得愛情好難成正比,唔知點解會咁!我係一個一投入就好黐身嘅人,有時係咁就釀成摩擦,又要同自己私人時間作取捨,有時會諗,拍拖真係幾煩!」

大把人追

未知是自欺欺人還是好Enjoy,Niki講出萬九幾個單身的理由,好讓自己過得舒服,她說:「依家單身,唔使同人交代咁多,可以出去見更多嘅事物,依家個人成熟咗同開放咗,可以諗多啲新方向。」不理不理還須理,靚女自然多人追,但Niki對追求者有另一詮釋:「我唔會視佢哋係追求者!只係當一個約會,大家做朋友可能會冇咁大壓力,做朋友同性異性都歡迎,呢啲係單方面,唔算係追求。」

盛女急嫁

畢竟年逾30,社會營造了剩女危機,難道Niki不害怕嗎?Niki化身阿Q說:「冇危機喎!睇你點睇,可以當佢係盛放個盛都得o架!我心態好正面,對愛情有要求,要搵就一定要搵到一個舒服、夠好同我認定嘅人!我依家過得好開心,感情係可遇不可求,有時仲會覺得拍拖好麻煩,所以接受現狀。係唔擔心,但有啲急囉!因為屋企人同好多朋友都問我幾時拍拖同結婚,搞到好似係我問題咁,但自己唔希望人有我有,可能唔去諗會更有出路。」

路是人行出來的,Niki家姐周汶錡即將做過埠新娘,與拍拖多年的外籍男友Julien共諧連理,Niki又可會想過湊老外呢?Niki說:「同老外做朋友就OK,但我同家姐唔同,我係一個好傳統嘅中國女性,所以都係搵番中國人好啲,因為同外國人始終有啲文化差異,我覺得溝通真係好緊要!當然最緊要係我將來嘅另一半係個好男人。」

唔飲呢杯茶!

男人多情而長情,女人專一而絕情,跟Niki相識N年,早知她性格專一。向來小記都知Niki喜歡飲熱檸茶,可是訪問當天卻變了喝熱華田,問她為甚麼?她說:「唉!我以前成日飲一直都冇轉,但有次杯熱檸茶飲到我肚屙,所以以後冇飲喇!」對,嚇怕了,還喝這杯茶嗎?

專案組

周麗淇與陳嘉桓(左)追求者不斷,慢慢揀Mr. Right!

陳嘉桓因父母離異,對婚姻較悲觀。

周麗淇沒有想過要學家姐周汶錡般嫁老外。