烈女闖「雄」溝 松岡情歸何處

有人說愛蒲愛玩的女孩要不得，阿媽教落搵女仔要搵個賢良淑德，但日模松岡李那（Linah）卻忠於自我，自稱「酒鬼」的她坦言並非貪玩，畢竟獨闖香港，人生路不熟，惟有去玩尋快樂解悶！

日模松岡李那擁有惹火身材，現年26歲的她憑33C「蜜桃胸」及42吋長腿「胸」降香港模界，但她於香港發展多年，話題總離不開拖仔夜蒲的新聞，早前更被本報直擊拖大隻仔夜蒲後連環嘔，提到瘀事，她說︰「我唔係好易醉，我覺得自己好飲得，因為飲酒係日本人嘅強項！」雖然自認飲得，但Linah難掩尷尬之色，慨嘆只是一場意外︰「嗰日我日本經理人嚟香港，所以我帶佢去蘭桂坊玩，我唔係飲好多酒，但有啲唔舒服，控制唔到所以嘔，真係好抱歉阻塞埋交通，我唔會再咁做，當係學習嘅機會。」

無酒不歡

在Linah的字典中，「酒精」二字不能缺少，她幾乎每晚都要喝一口，而且並非啤酒，而是酒精濃度高的日本燒酒︰「因為喺香港成日自己一個好悶，所以每晚都喺屋企一邊睇戲一邊飲，Relax吓。」但她坦言夜蒲會適可而止，更不擔心會被人借醉行兇︰「我唔想畀麻煩人，如果我唔掂就唔會飲！而且我朋友好照顧我，唔會畀唔識嘅人埋身，所以未試過畀人抽水。」也許別人覺得她愛蒲為識型男，但她說︰「我最初嚟香港，完全唔識講英文，同其他人溝通唔到，有時只可以做Body Language，所以好悶，但嗰啲地方比較易識朋友。」並表示要把香港文化介紹給日本朋友認識︰「蘭桂坊係香港文化，我嘅朋友嚟香港，當然想畀佢哋睇吓啦！但我唔會玩得好癲，因為呢啲地方會有危險！」

「友」仔冇愛

Linah來港後雖未見桃花旺盛，但身邊總有緋聞男友，除與潮牌創辦人Philip Chu拍拖較為人熟悉外，早前她更被發現於Facebook上載與日本型男舞蹈員的親密照，她說︰「我依家冇男友，嗰個係我好Close嘅好朋友，乜都會傾。」她大讚對方條件好，惟對發展戀情卻步︰「我幾鍾意佢，佢係Dancer，會教我跳舞，但佢喺東京、我喺香港，大家身處唔同地方，要維繫感情唔易。」而另一緋聞男友葉文輝，她坦言對方是她的老師︰「佢係我喺香港第一個男性朋友，因為當時我唔係好識講英文，佢幫咗我好多，係我好朋友。」至於其他異性朋友，她說︰「係正常社交，我唔覺得有人追，之前影到嘅，其實仲有好多朋友在場！」

食正戲路

喜歡夜蒲的她早前有機會接拍電影《喜愛夜蒲2》，令她可以寓工作於娛樂，她說︰「真係好好玩！I love the drink and love the music（我鍾意嗰啲飲品同音樂），可以識到好多朋友。我喺戲裏演DJ，雖然有感情戲，但只限咀戲。」提到戲中有多位型男，她說︰「我比較鍾意Dominic（何浩文）嘅角色，佢係警察，雖然同我有感情戲，但只係Pure Love，因為我鍾意一夜情，所以會揀戲入面嘅佢！」

後記：錢大過愛

單身一族的Linah雖然經常「畀仔圍」，但她卻認為錢比愛情更重要︰「工作最重要，我努力搵錢先，之後先諗呢啲嘢啦！」話雖如此，她卻開出擇偶條件︰「要高大，唔一定靚仔，同埋要照顧我，呢樣好重要o架！」見她身邊的異性氹氹轉，小記亦希望她盡快找到Mr. Right！