缺席活動買紙尿片傍身栢芝屙足7次

張栢芝昨日為了一隻雞蛋屙足7次，更連累逾百記者苦等又撲空，結果新片宣傳10分鐘便匆匆散場。屙到腳軟的栢芝現身無錫機場，耍冧兼自爆將入院做小手術檢查。

由張栢芝擔正的新片《河東獅吼二》今日在內地上映，她與內地男星小瀋陽、張馨予和黃維德等舉行一連串內地宣傳攻勢。栢芝原定昨日早上與演員先出席「新亞洲娛樂」落戶無錫國家數字電影產業園簽約儀式。但活動開始後，「新」老闆余毓興親自上台解釋：「唔好意思，栢芝前一晚預備來無錫時遇上車胎爆了，加上深圳有雷暴，故此改了今天凌晨出發，現在她已到了，稍後會跟大家見面。」'

十分鐘散場

其後在下午《河》片媒體答謝會上，工作人員表示栢芝因肚屙缺席，答謝會更於10分鐘後匆匆結束。對於栢芝連番失場，令來自全國各地、逾百名專程到無錫採訪的記者撲空，更有傳媒為此鼓譟！本報記者其後在無錫機場發現栢芝芳蹤，她一臉憔倅，有氣無力地由助手陪伴，記者上前訪問和拍照，她最初一臉驚訝，惟仍停步接受訪問。

返港睇醫生

她解釋因吃了一隻未全熟的雞蛋而肚屙：「我一嚟到就化妝，因為有啲肚餓，有人烚雞蛋畀我食，可能未烚熟，我一食就肚屙，仲屙咗七次，完全唔可以離開冼手間！（今次缺席咁大型嘅活動，擔唔擔心經理人公司同客戶不快？）屙得咁辛苦，要嬲都冇辦法！」她透露希望盡快返港睇醫生，但知道香港正掛風球亦擔心航班問題，心急的她無奈笑說：「要買成人紙尿片呀！」其實近來栢芝身體欠佳，她說：「依家食親海鮮同辣嘢就絞肚痛、肚屙，醫生建議我入醫院做小手術，作一次詳細身體檢查。但我工作太忙，冇時間去做。」其後她由機場工作人員帶到特別通道入閘。