笑克勤飲人奶 阿倫亂咁噏反被寸

譚詠麟（阿倫）與李克勤合資的餐廳開張，心情大靚的阿倫跟克勤大講有味笑話，笑指他飲老婆人奶，克勤立即反擊暗寸阿倫口多多！

再度榮升老闆的譚詠麟與李克勤，昨日為合資的「左麟右李粥麵小菜專門店」舉行開幕禮，圈中好友鄭則士、黃柏高及胡楓等撐場，吸引逾半百途人圍觀，場面熱鬧！

阿倫坦言沒計過投資金額：「間餐廳係心血嚟！我試過好多食肆，對雲吞麵好有心得！（做飲食界巨子？）一步一步嚟！」而克勤自爆二人於十年前被經理人比喻為抵食雲吞：「順理成章賣雲吞！」兩位老闆表示每天都會落舖「監場」：「要睇住啲水準嘛！」

預告合體開騷

他們透露倫媽媽及克勤兩個囝囝已試食，克勤打趣說：「依家傳奶粉有事，細路唔好食咁多，食多啲雲吞麵！」並指細仔已戒奶，在旁的阿倫即大講黃色笑話：「細仔仲飲人奶？留番畀老竇啦！」克勤即帶笑還擊：「唔怪得杜麗莎『咩啦』！」暗寸阿倫早前與杜麗莎開個唱時，口多講錯說話激嬲對方！而當提到兒子時，阿倫即顯得避忌拉開話題，克勤亦不便搭嘴：「佢係長輩，我都唔敢多講！」

他們還透露有意衝出香港開分店，又指已入紙紅館，預計明年「左麟右李」將會再度合體開騷！