祖兒愛貓離世 強顏歡笑谷「戲」避談浩龍

天后容祖兒的愛貓「妹妹」昨日凌晨離世，祖兒趕返港見最後一面，雖然飽受喪貓之痛，但她昨晚已收拾心情，盛裝出席新片《DIVA華麗之後》活動。

向來視愛貓為家人的容祖兒，其中一隻陪伴她12年的貓「妹妹」離世！前晚從內地趕返港的祖兒，昨日凌晨在微博透露，接到容媽媽急電指「妹妹」不行後即趕往醫院！由於「妹妹」近日身體虛弱，對上一次臨行前已跟牠說：「一定要等我返嚟！」而「妺妹」亦聽話等到主人返港，祖兒說：「你也不要再撐了，妹妹豬妹妹，我愛你，希望你這一生過得快樂，安心睡覺吧，永遠想念……」愛貓離世令她徹夜難眠，凌晨4時半再發微博：「再見了，我最愛的『妹妹』，你是我的家人……希望張敬軒見到的UFO不是用來把你接走，我們下世要見面。」

火化愛貓

雖然愛貓逝世，但祖兒昨日接受本報電話訪問時表示，已收拾心情工作，前晚已接「妹妹」返家共度最後時光：「唔想貓貓吸氧氣，醫生話唔能夠延長壽命！（喊爆？）點都會有！」她表示「妹妹」帶來很多回憶：「佢係『最佳交際花』，每次屋企有客人嚟，佢都識招呼朋友！佢喺我生命中幾重要！（身後事？）將佢火化，將骨灰同之前過世嘅貓一齊放！（將骨灰放喺吊墜做紀念？）唔會！」她表示家中養有5隻貓，但有3隻先後離世。

祖兒昨晚繼續開工，與杜汶澤及導演麥曦茵出席《2012夏日國際電影節『DIVA華麗之後』》首映禮，盛裝亮相的祖兒強顏歡笑。問到有否與男友劉浩龍（師兄）慶祝生日？她封嘴不談：「唔答！（幾時補祝？）我尋晚先返！（你煮飯畀佢？）你哋話之嘛！」有指師兄生日當晚悶悶不樂，她說：「我每日答你等如同意大家將我個名連落呢度，所以要絕情少少！（唔想連落佢個名？）我嘅意思係感情同私人嘢！（好絕情？）識我嘅人會明白同體諒！（同師兄有共識？）唔講咁多！」