鎮宇開火

躁底的吳鎮宇前晚在中環拍攝無綫新劇時再被辣慶！因遭助導「老點」慘兜冤枉路，及因圍觀途人閃燈拍照慘吃NG的鎮宇，向助導及途人開火！難得同劇拍檔陳法拉仍大讚鎮宇好人，曲線證明鎮宇唔會亂扯火！

躁火影帝吳鎮宇前晚與無綫花旦陳法拉在中環拍攝無綫新劇《衝上雲霄II》，比原定時間早到的鎮宇，因與劇務未溝通清楚，令他兜了一小時才到達，甫落車即向PA（助理編導）開火：「唔好話我知又去番頭先嗰度拍呀！我兜咗好耐o架！」其後正式拍攝時，又因現場聚集不停開閃燈拍照的圍觀途人，令慘吃NG的鎮宇再度無名火起，未等助導出手已率先向途人施展鎮壓吼功：「唔好再閃燈喇！」現場始恢復平靜。

溝通出現問題

不過向來專業的鎮宇拍攝時絲毫未有因「怒火」分心，為求搞笑即爆肚向法拉講對白：「對腳好似跪過玻璃咁，又瘀又黑！」法拉亦十分機警以Rock友手勢「回敬」，成功帶動氣氛！

接受訪問時明顯已「息怒」的鎮宇坦言，因與助導溝通出現問題才發忟憎：「其實一個鐘頭前我到咗，同劇務講咗，點知又唔見佢哋，激氣到吖！」他更表示不會因此後悔接劇：「拍戲梗有呢啲情況出現。（有啲亂？）習慣咗。」他又指爆肚純綷為搞氣氛：「劇本有啲嘢唔好玩咪玩吓囉，不嬲都係咁執。」至於法拉的全黑Rock Look打扮亦相當搶眼，她透露用來配襯的耳環、手鏈及手鐲全借自朋友，並笑謂最Rock的年代是當年在外國讀書時：「我修到條眉好幼，仲搽啲又紫又啡嘅嘴唇。」她更大讚鎮宇好人：「只要做晒功課，讀熟劇本就OK，佢現場會教我好多，咁耐以嚟都未鬧過我，上次拍電影都冇。」曲線證明鎮宇火得有理。

崔建邦有壓力

至於曾在低潮期捱過一段艱苦PA日子的崔建邦，承認當PA有一定壓力，因要應付許多事情：「自己做嗰陣都好新，所以要用多啲時間做準備以及同演員溝通，慶幸都冇畀人『省』過。（會唔會忙中有錯？）自己都做過藝人，知佢哋嘅想法，會諗多一步。」