梁政珏 陳靜儀愛‧不疚

父母患病，作為子女的豈有不赴湯蹈火之理？藝人梁政珏及模媽陳靜儀（Mia）為照顧父母仆心仆命，一個停工半年默默守候，一個忍痛面對父親離世，名副其實的娛樂圈廿四孝女兒！孝，未必可以動天，卻足以令人動容。

無綫新一代「咪神」梁政珏去年開始活躍視壇電影圈，並頻頻獲邀出席公開活動，與大班身材出眾的女星爭妍鬥麗，但今年初她竟在事業處於發展期時默默退下火線，絕迹螢幕。原來是其母頸部長了惡性腫瘤而要動大手術，她遂向公司請假以陪伴母親身邊：「呢半年我都冇做嘢，幾乎日日喺屋企陪媽咪，或者陪佢進出醫院。」

無悔停工

母親患病，令她對人生多了體會，明白到以前一直緊張的東西只是浮雲：「喺呢啲時刻個人諗嘢會好唔同，當試過同親人經歷過咁嘅生死關口後，你會學識唔再理啲瑣碎嘅事。」她又不諱言以前是個思想較負面的人：「依家諗嘢會正面啲，好多人都覺得我荒廢咗半年，但我唔會咁諗，好開心決定一直陪喺媽咪身邊。」

母親接受手術前的舉動，梁政珏仍歷歷在目：「佢好似交代所有嘢咁，前一日我哋全家去飲茶，佢着到好靚好開心，仲將保險箱鎖匙交低，嗰刻我哋好心噏同好唔鍾意！」但想深一層，她反而敬佩母親勇於面對頑疾的勇氣：「有啲人患病會呃自己，唔敢面對死亡，但我媽咪肯面對，令我明白到當你仲活喺世上，就要識知足，珍惜眼前人，豁達啲，唔好咩都諗一餐，鑽牛角尖。」

今次事件亦將梁政珏一家人的關係拉得更近，全家人為母親而奔波，連身在英國讀書的妹妹也趕返港照顧母親，令她跟兄弟姊妹的感情突飛猛進：「其實我哋之前好少見面，咁就少溝通，反而依家關係好咗好多，成日都會見面！」近日漸漸復工的她說：「好想接劇拍，發揮吓唔同角色，仲記得啱啱入行嘅時候有監製話我太細路女，要經歷過甜酸苦辣先得，經過今次，我體會多咗，對演技有一定幫助！」雖然她這一退便半年，但箇中體會，卻能得着一輩子！

後記：酒為上着

擁有34D上圍的梁政珏從不介意將美好身材展現人前，外國長大的她雖然有鬼妹仔性格，但原來她第一次行泳衣騷時都要靠杯中物壯膽：「要飲杯酒先敢行，希望下次喺唔緊張嘅狀態，可以表現得更好！」

模媽陳靜儀（Mia）的人生並不平凡，經歷總比同齡的女生多一點，兩年多前她入行做模時被指整容及被揭已是一子一女之母，但這些負面新聞令她更為人熟悉，助她擺脫新八模之名，單飛發展。但世事難料，事業漸入佳境時，Mia卻要中途「休息」，去年父親患癌去世，這種失去至親的痛苦猶如一拳擊在Mia面上，痛得她即時跌低：「爸爸病嗰時好傷心，開頭收埋自己同不斷喊，接受唔到，所以同公司攞假照顧佢。」

望着父親被病魔折磨，身為女兒的Mia尤其心痛，但父親即使痛得幾深，病得幾辛苦，他仍然安慰家人，這種樂觀的性格同時教Mia堅強起來︰「既然爸爸都咁積極，我都要積極咁去面對！」父親的離世確曾令Mia崩潰，但往後的日子還是要過，收拾心情後的Mia年初捲土重來，殺入寫真戰兼拍電影，她說︰「之前屋企嘅事確實唔開心咗一排，但路都要繼續行，仲要勇敢向前笑住走下去！」

冇做「小三」

可惜負面新聞始終圍繞着努力的Mia，先是被指搶師姐周秀娜（Chrissie）男友Avis，加上寫真慘變「18禁」，以及遭到別人歧視，這些新聞接二連三發生，令她頓成負面人物！但Mia依然豁達面對︰「新聞係咪負面，各人睇法都唔同，外間點睇我好難逐一解釋！好似拍《喜愛夜蒲2》，我覺得可以發揮，之後知係同Avis一對，講真冇諗過搶人男友，清者自清呢句話太老土，但我哋只係好朋友。」

話雖如此，Mia卻坦言拍攝時確實跟Avis有戀愛的感覺：「作為專業演員可以抽離到，我知點做，冇同Chrissie解釋，覺得冇需要，相反我煞有介事去講，反而無私顯見私。」對於寫真變「鹹書」，大感無奈的Mia強調這不是宣傳噱頭︰「寫真性感無可避免，最後過唔到審批我都好緊張，中間當然好擔心，話晒都係首本個人作品。」也許圈中不少人對她避之則吉，但原來仍有人覺得她是清泉，她說︰「入行以嚟同我合作嘅人都想避開或者孤立我，當中有模特兒、幕前幕後嘅人，但Avis從來唔覺得我有問題，呢個就係我同佢咁好朋友嘅原因。」

後記：熟女再作戰

Mia談到家中的不快事及負面新聞，面上沒悲傷的表情，反而與小記分享樂觀事，也許這就是成熟的表現，同時亦教曉我們遇上挫折不應怨天尤人。看來經過這些不平凡的經歷後，Mia確實長大了！