基仔唱好航天員：隻手好柔軟

古巨基、李克勤、鍾舒漫、鄧紫棋（G.E.M.）及黃智雯等，昨日代表香港市民款待三位訪港航天員，古巨基獲安排與景海鵬交談，而與劉翔熟落的基仔，更轉述對方倫奧後的康復情況。

多位歌星，古巨基、李克勤、G.E.M.、鍾舒漫和狄易達等昨日現身灣仔會展，出席《全港歡迎神舟九號載人航天代表團大匯演》，古巨基獲安排與景海鵬交談。

基仔對於能與航天員對話，感到十分興奮：「我可以同航天員傾偈，感到好榮幸。我代啲同學仔問佢，太空人喺太空究竟食乜、飲乜？我好期待佢下次可以帶啲香港美食例如煎腸粉上太空。（做東道主，帶航天員遊香港？）相信佢哋行程好緊密，未必抽到時間。但我頭先同航天員握手，發覺佢哋隻手好柔軟。」

劉翔心情輕鬆

基仔又自爆與早前在倫敦奧運傷出的「欄王」劉翔聯絡過，他說：「我哋有通過Message（訊息），知道佢依家治療緊，對康復有信心，我都好開心，佢情緒幾輕鬆，仲叫我放心，佢幾時返賽場，唔係我大前提，最緊要佢康復理想。伯母話心願係劉翔搵番個女朋友，我都一樣。（介紹女仔？）冇，我冇朋友咁高又鍾意運動。（佢有張梓琳做女友？）我八卦過啦！佢話唔係，係緋聞咋！」

李克勤亦稱與航天員甚有緣：「我同航天員好有緣，佢哋次次來港，我都有份演出，我屋企仲掛住同楊利偉張合照。我有灌輸個仔太空知識，仲叫佢記得睇我今次演出。」

談到無綫被指發生偷拍及竊聽，他說：「有冇影到我？會唔會係樂易玲傾慕者咋？依家去到邊都有人影相，冇得避，若果偷錄埋聲音就怕洩漏機密，不過件事隔咁耐先爆出嚟，小事一則啫！」