樂瞳愛做冒牌港女

身為香港女仔，如果被稱為「港女」，定必反枱冇情講！不過對於因扮港女而成功彈出的樂瞳來說，被說成港女又算得甚麼？只要分得清戲中人與真人其實是兩個個體，演港女也可比住在瓦努阿圖（世界上最快樂的國家）更快樂！

不知從何時起，香港奉行了一個新詞彙叫「港女」來形容香港女生；亦不知從何時起，無綫小花樂瞳在劇集中每每重蹈港女的覆轍，如果你問「港女造時勢」還是「時勢造港女」？相信後者一定比前者更恰當，因為現實中的樂瞳與「港女」可以說是風馬牛不相及！

未知是否因為樂瞳的身形嬌滴滴、擁有童顏的關係，總是被監製挑選成為受盡萬千寵愛、驕恣的妹妹仔角色，由劇集《點解阿Sir係阿Sir》飾演的學生妹中女，以至《護花危情》的表妹李巧欣，她的個性亦總離不開潑辣野蠻、拜金、追求潮流，讓她把典型港女演得活靈活現，往往令觀眾拍案叫絕！

雖然演得好是好事，不過演得多一來會被定型，二來也會令觀眾誤解劇中人就是本人，對此她亦有同感：「其實都定定哋型，曾經有賣衫嘅Sales、街上搵我影相嘅妹妹同我講：『我成日都以為你好巴渣，不過原來你係咁靜o架？』跟住我就同佢哋講：『係呀係呀！嗰啲戲嚟o架咋！唔好咁認真啦！』」

雖然樂瞳常常被人曲解，不過她坦言不抗拒演港女，更認為凡事並非絕對，因為演港女根本沒甚麼好怕：「其實我做港女都做得幾開心，因為做開有條路，做到熟晒！而且做呢類角色最開心可以扮靚，又有靚衫着！」

愛恨分明

講到戲內，樂瞳總是有不少觀音兵在她身邊轉來轉去，更不時有男性向她埋身，不惜發動名牌攻勢追求她！不過如果你代入了戲中的角度去看樂瞳的愛情觀，這樣就大錯特錯！

她說：「其實我愛情經驗好少，我對感情係個好認真嘅人，如果我知道人哋對我有意思，而我又對人冇意思，我係唔會好似戲入面咁吊住人、養一班觀音兵，亦唔會同人曖昧吓先！當我認定對方，就會同佢開始，相反對佢冇感覺就會敬而遠之！」

如果按照樂瞳的愛情觀所言，她應該是零緋聞才對，不過她的緋聞卻是一浪接一浪，而緋聞對象更有合作過拍劇的陳偉洪、黃得生、朱敏瀚及楊潮凱，對此曾揚言不接受姊弟戀的樂瞳則說：「同我傳親緋聞，絕大部分都係細過我，唯一只有楊潮凱係大過我，而我當阿凱係兄弟，好多時都當咗自己係男仔咁同佢相處，搞到佢都話我好粗魯！」

家庭第一

雖然樂瞳對感情愛恨分明，不過依然無損別人向她展開追求，她亦深明現時正值是工作的黃金搏殺期，所以對於愛情也不願多想：「未可以發展住，因為依家最緊要係做好當前嘅工作，而且拍戲係需要用好多精神同時間！」

與其說樂瞳是港女，不如說她是孝順女可能更貼切，因為她甘願把愛情拋諸腦後，選擇在工作上全速前進，目的都是為給父母更好的生活：「最近聽過一句說話：『我成功的速度一定要比父母老去的速度快。』我好想父母嘅生活可以舒舒服服，因為Daddy依家做緊一份比較辛苦嘅工作，所以希望佢快啲唔使做，然後養佢哋！」

一想到父母，樂瞳亦恍如裝上摩打一樣，即使面對排山倒海的工作也從不覺累：「其實我都好享受現時忙嘅時間，因為唔會諗其他無謂嘢，尤其見到已經塞爆晒嘅時間表，我就會覺得好High！」

渴望攞獎

的而且確成功需苦幹，雖然年底才是台慶頒獎禮，不過樂瞳在劇集《當旺爸爸》中扮演夏雨的孻女已得到觀眾的好評，在台慶奪獎呼聲極高，問到她是否想重奪去年失落的飛躍進步女藝員獎，她的想法亦相當樂觀：「梗係希望再提名啦！失敗唔緊要，最緊要係再接再厲！其實我都好希望每一年都可以Keep住坐喺台慶頒獎禮上、每年都不斷進步！有時睇到網友、同事讚我演技有進步，又或者佢哋提點我不足嘅地方，都已經好開心！」

後記：AA制拒黐餐

訪問前，樂瞳與曾合作的羅鈞滿（Moon）在飯堂進餐，其後Moon告訴她已付了帳，不過樂瞳堅拒不願，擾攘一輪後，Moon都說服不了她，最終變成AA制各自付帳。原來樂瞳除了對愛情愛恨分明外，對金錢亦然，試問她又有何「港女」之有？