Fiona離華納如情侶分手
由華納一手捧紅的薛凱琪（Fiona），突然傳出離巢的消息，Fiona昨日親口證實：「我同華納約滿咗，本來我口頭上答應繼續合作，但因一啲合作方式嘅變動，係好無奈。」她形容跟公司像情侶，但被迫分手：「華納係國際性公司，我知香港老闆都控制唔到，佢都盡咗力，雖然我哋分咗手，但我哋都好愛對方。」
她又謂不擔心被指飲水不思源：「我做任何嘢都對得住自己，我哋大家都知咩事，尊重大家我唔會講原因，呢啲係私事，好似同男朋友分手，我都唔會同人交代。」因難捨多年感情，她透露日前親筆寫心意卡給同事時，邊喊邊寫，她哽咽說：「佢哋好錫我，日前同佢哋搞歡送會，啲同事都喊。」而華納劉經理表示視Fiona如親生女：「開心睇住個女嫁咁，大家合作好愉快，留低好多美好回憶。」