Iris自責入錯行
「爆E超蓮」鍾采羲（Iris）與同公司的林宜芝Monna昨日舉行寫真簽名會，二人分別送自畫像及自製Cup Cake給粉絲。問到谷胸上陣的Iris是否擔心引人犯罪？她自言食得鹹魚抵得渴。談到模的種種是非，她說：「我覺得係要鬧，但鬧嗰個係我自己，因為我選擇咗入呢行，冇遠見，我幾年前啱啱入行只係鬥身材鬥靚，依家就鬥出位，我唔可以怪其他人，只有鬧自己選擇咗呢行。（扮清高？）唔係，做模一啲都唔清高，我只係話我一定唔會除底褲同露點。」
簽名會完結後，Iris到養和醫院，她表示因皮膚敏感要睇醫生，其後她得知何超蓮及何猷啟也在醫院內探望休養的父親何鴻燊。此外，何超蓮力撐近日被網友挑釁應把置裝費作善事的姊姊何超雲，認為做善事放在心上便可。
Iris（左）與Monna舉行寫真簽名會，並送自畫像及Cup Cake冧粉絲。
超蓮與猷啟到醫院探望賭王。