劉家豪力撐內地人爆Like

鍾嘉欣前晚拉隊出席飯局睇劇集大結局，結局出街後卻被網友指爛尾兼不合情理，亦有發現無綫鬧演員荒，兩線劇起用相同的逾五十名演員；監製劉家豪指劇集獲內地觀眾力撐！

鍾嘉欣與黃宗澤（Bosco）主演的劇集《護花危情》前晚播出兩小時結局篇，一眾演員與已離巢的監製劉家豪及秦沛等出席飯局睇電視。嘉欣指Bosco因到外地工作而未能出席，而她早前透露劇集會有意想不到的結局，最後卻換來觀眾的插爆！

不少網友指《護》劇結局有抄襲電影橋段之嫌，講述「許Sir」Bosco為救「大喬生」秦沛而被貨Van撞至飛起，卻奇迹地站起來駕電單車找未能終成眷屬的「喬小姐」嘉欣，戴上定情頭盔的他最後於嘉欣面前噴血而死，情節被指不合理又老土。而早前於劇中出現有關「許Sir」的道具報章，被發現曾出現於Bosco的舊作，惹來粗製濫造之嫌！

而無綫鬧演員荒的問題，亦於同檔期不同時段、同由劉家豪監製的《回到三國》及《護》劇中看到；李國麟、李成昌、蔣志光、張穎康、羅樂林及曾偉權等逾五十位綠葉及配角，「有幸」連續於兩個時段讓觀眾一睹古裝及時裝風采。劉家豪接受電話訪問時說：「呢班演員合作慣，再用佢哋都理所當然，但冇諗過公司會安排兩套劇同檔期播。」至於結局捱批，他力撐：「好多內地觀眾都好鍾意個結局，可能各有所好。」

鍾嘉欣戥杏兒唔開心

另外，嘉欣前晚在飯局上透露有短訊慰問甩拖的Bosco，她說：「佢冇覆，希望佢哋盡快平復心情。我同杏兒比較熟。（佢喊晒？）分手梗會唔開心。（聽過Bosco訴苦？）冇，佢哋都好成熟！（傳佢花心？）同佢拍咗三套劇都冇傳過！（引以為鑑唔公開戀情？）唔會。」而樂瞳被指經常於劇集着短裙而走光，她直認主動要求避免着長褲：「唔係有心（走光）！」至於會否隨劉家豪過檔？她只表示與無綫還有很長合約。