羅仲謙見楊怡家長

羅仲謙與楊怡這對緋聞情侶早前被踢爆結伴遊韓國，謙仔昨日惟有承認親密關係，而楊怡姊姊則表示母親亦有同行。

羅仲謙昨日與壽星女樂瞳出席為香港運動員打氣的活動，拍了半年無綫劇的謙仔被問到是否與緋聞女友楊怡一齊遊韓國Relax時，他以半推半就的態度承認，但當被記者取笑不用買人參，因為他的「心」已去了楊怡處時，他卻招架不住，並聲稱同行還有其他朋友：「同行仲有男有女。（唔怕多人認得？）自己未去過。（預支蜜月？）私下先答啦！（韓國多整容醫生喎）嗰邊其實好多嘢食，我買咗好多衫、褲。（男裝定女裝？）男裝！（感情增進一大步？）精神就進一步！」

樂意情侶檔搵食

由於二人關係已是半公開，問到可會組「情侶檔」賺錢？謙仔亦不再迴避說：「冇問題，有錢收梗去！（情侶檔收貴啲？）合理價啦！有錢賺乜都做啦！」

提到無綫劇《飛虎》收視高開，演員馬德鐘曾稱如收視達37點便着泳裝慶祝，而謙仔聽後亦稱冇托手，他說：「得嘅，但我會着平腳泳褲！」

此外，楊怡姊姊昨日出席活動，提到妹妹與謙仔同遊韓國，楊卓娜說：「我淨係知佢同媽咪、朋友去，我因為有嘢做去唔到（支持阿妹同謙仔拍拖？）如果佢鍾意都支持。」