苟芸慧傾慕 梁烈唯拒愛

女神喎！苟芸慧喎！試問天下雄性動物捨得拒諸門外？莫非梁烈唯蠢到加零一？連苟姑娘都話「有少少鍾意咗佢」，唯唯竟站在道德高地請女神食檸檬？對不起，唯唯忍耐力神級驚人，苟姑娘塗一次面懵膏又如何？她，大把人追！

現代愛情故事，女追男可能隔重山，苟姑娘開到聲話「有少少鍾意你」，唯唯為何不領情，你估自己真係飛虎咩？

記：記者　唯：梁烈唯　慧：苟芸慧

記：第一次演情侶檔？

唯：係，識就識好耐，合作就第一次，女神苟芸慧第一次同我草根梁烈唯合作。

慧：我仲要追你喎！

唯：係呀！真係發夢都諗唔到，係發夢都諗唔到點解苟姑娘咁遲先追我！

慧：我都覺得係，現實生活中，唯唯係一個好好嘅男仔。

唯：我當然係好男仔啦！如果我喺現實生活中追苟姑娘，我諗一定追到囉！

慧：唔……你好大機會囉！你知唔知自己有幾好咩？你細心啦、做嘢認真啦、搞笑啦……我諗可以諗到一百樣唯唯嘅好處。

唯：哈！咁你講三樣啦！

慧：第一，佢真係極細心，好體貼同Gentleman；第二係佢真係好感性，可以突然講啲說話觸動你心靈，喺佢身邊充滿驚喜；佢搞笑唔使講，見到佢個樣就已經眉開眼笑。

唯：你咁讚我，我真係怕醜o架！可能我平時形象比較搞笑，但有時突然間講啲認真說話，所以苟姑娘覺得我與別不同。

女人湯圓

慧：如果唔喺現實中認識唯唯，冇人知佢有另外一面，當你知道後，真係會想去探討呢個人，令你有少少鍾意咗佢。

唯：老實講，我係一個好靜嘅人，點解我平時一返到公司就笑晒？係因為我一靜落嚟，啲同事就以為我病，個個就會問我係咪唔開心。我唔想影響到其他同事工作嘅情緒，所以要Keep住一個興奮Mode，令同事唔好擔心我。如果我嗰日要拍傷感嘅戲份，直情唔會入化妝間。

記：苟姑娘講到你咁好，現實生活係咪好多女埋身同追你？

唯：都唔係好多女仔追我，但係真係有好多女性朋友，喺TVB入面最好嘅朋友大部分都係女仔。除苟姑娘外，仲有龔嘉欣、唐詩詠、胡定欣、楊秀惠、姚子羚、黃智雯……反而男性好友只係得幾個。

慧：女人湯圓喎？

唯：哈哈哈！係，我認！

多重性格

慧：我諗係因為唯唯細心，Feel到女仔嘅諗法，用男仔嘅角度去幫女仔解決問題，所以女仔鍾意同佢Share心事，畀一啲自己睇唔到嘅角度你囉！好安心同佢傾偈。

唯：所以我知好多電視城嘅秘密。

慧：但你會選擇口密，唔會周圍爆大鑊。

唯：除此之外，其實我都係一個多重性格嘅人，但未誇張到精神分裂。我可以好開心，突然又好Sad，突然又好憤怒；可以有好細心嘅時候，又可以好粗心大意，亦可以討好女仔。

慧：其實你情緒化已經好似女仔，我都係咁，所以要用另一種方法去控制自己。

記：苟姑娘講到你咁好，唯唯又覺得苟姑娘點呢？

唯：靚唔使講啦！樣靚梗有優勢啦！但對於我嚟講最緊要係心地靚，苟姑娘係少有樣靚、心地靚嘅人。佢冇乜機心，呢行識得太多人，好多人都好有機心，佢就一啲都冇，好真。女仔嚟講，佢亦係一個好爽快嘅人，唔會婆媽，好似要拍一場錫嘅戲，佢絕對唔會扭擰，太專業喇！佢亦都係一個好勤力嘅人，公司好栽培佢，苟姑娘唔會因為咁而自滿，佢嘅努力比一般廣東話講得好嘅女仔更努力，見到佢廣東話愈嚟愈進步，就知佢下過唔少苦功。

慧：專業呢樣嘢其實係你同我講，唔知你記唔記得，拍《飛虎》第一場戲等埋位，係你同我講做一個演員要專業，就算導演冇畀指令你，都要試吓用唔同方式去演好佢。好似有一次要拍一場Kiss戲，突然導演要我幫一個臨時演員做人工呼吸，嗰刻我唔係諗咀唔咀落去，而係諗我驚做得唔似，我唔想影響觀眾，Media好影響小朋友，影響到佢哋會好罪過。

唯：嘩！你一定係一個好媽媽！女神嘅名譽唔係咁容易攞到。

抽離角色

現實跟幻象埋藏幽冥地帶，分得清是真是假，就不會有那麼多緋聞情侶出現，畢竟大家都是人，苟姑娘和唯唯如何為情定分界？

記：講得出苟姑娘係女神，喺劇入面又咁主動去錫你，有冇一刻嘅衝動去追佢？

唯：想，但係冇，因為我分得好開工作同現實生活。講真，我已經有一個好好嘅女朋友，佢心地好好，係我嘅陳妍希，冇錯係好肉麻，但我就係咁幸福。苟姑娘係超級好，但更想同佢做好朋友，喜歡同鍾意唔同，我喜歡苟姑娘，但我知道我哋唔會一齊。但拍戲時我就真係要鍾意佢喇！但收工就要收番感情，如果唔係就好大鑊，所以收工後唔會有電話同短訊聯絡，唔係好容易會撻着。

慧：呢樣嘢我都問過唯唯，點先可以分開真實同拍戲，佢話完咗套劇，三個月完全唔見面唔打電話，就會冇咗個感覺。

唯：唔識抽離會好唔公平，帶埋工作去現實生活，第一會令你個人好辛苦，第二對你女朋友、屋企人、甚至朋友都好唔公平，如果因為咁破壞人哋家庭就更加唔專業、更可恥，呢啲都係Chilam（張智霖）教我。

慧：下次拍嘢有機會都問吓佢先。

記：多唔多人假戲真做？

唯：如果有都唔會話畀你知，冇錯係有呢類情況發生，關係仲可以Last好耐，結婚生咗仔都有，但我哋唔應該咁樣就話每個男演員就係淫，就係但求就手，咁好唔公平。

後記：豪氣埋單

苟姑娘外表斯文，原來內裏Open。例證一：埋單時三張信用卡主動結帳，苟姑娘竟一手撥開唯唯和小記的卡……豪氣吞天下；例證二：搭車時小記等車離開，苟姑娘着小記上的士，不順路也夾硬車小記去目的地……女神下凡塵，是幻覺還是現實？

後記：因公忘私

唯唯真的把工作和現實生活分得好開，訪問當天，他圈外女友十萬火急Call了他很多次，為了不打斷訪問，唯唯索性把電話關掉，苟姑娘問：「你唔怕女友詐型？」唯唯說：「怕乜？做緊嘢，天王天后都冇面畀！」唯唯果然有雷！