傅穎忙了．忘不了

傅穎與羅仲謙去年的不快戀情鬧得滿城風雨，她亦因此「休息」了一段時間。事過境遷，重新出發的傅穎與羅仲謙已成過去式，事情亦已告一段落，所謂「愛一個、上一課」，傅穎已對他「有痕冇恨」！

宅女再闖情關

傅穎去年與羅仲謙的不愉快戀情，可謂兩敗俱傷，她還「休息」了一段日子。經歷了人生低潮的傅穎今年重新上路，並不懼怕再談情說愛：「拍拖有開心過亦有唔開心，每個人帶畀我嘅經歷都唔同。因為一次唔好經歷而封閉感情世界？我覺得唔需要，曾經遇過好好嘅人，亦同曾經拍過拖嘅人繼續做朋友。」

自言感情生活空白及「冇乜特別」的傅穎，是否抗拒提及羅仲謙？她表示不能當沒事發生：「呢個人同呢件事對我嚟講已經係過去式，我唔希望喺『現在進行式』時候，不停將以前嘅嘢帶到依家，件事已經告一段落，唔需要再圍繞住以前！（憎佢？）唔會！（若然要提佢呢？）睇吓問乜嘢啦！（經一事長一智？）我學到好多嘢！」

至於會否「閃婚」？傅穎笑說：「我咁鍾意做嘢，諗唔到自己會閃婚，但會結婚同生小朋友。」談及擇偶條件，她會選成熟、能溝通及有共同目標的另一半，但暫時「查無此人」：「唔會刻意去搵，依家亦冇人追，我係一名宅女，啲朋友話我做宅女唔係幾好喎！」

出寫真變中女

除了愛情受傷外，傅穎的事業亦經歷了高低起跌，但她依然樂天：「係幾得意，經歷好豐富嘅嘢，從中會反思有冇做得唔好。去年到今日係我人生轉捩點，突然諗通好多嘢，知道有啲地方可以做得更好，令自己成長。（迷失過？）2009年試過，嗰段時間好多工作，但同時又畀自己好大壓力，除咗做嘢，冇晒自己生活，冇自我，其他人返到屋企會做其他嘢嘛，但我返到屋企會坐低諗工作嘅嘢，成個人好唔開心，直至去年開始，我先可以Enjoy生活，以前做嘢，就乜都唔理，亦好少同媽咪講心底話，依家覺得以前咁樣好唔應該，最重要係你身邊人。（自殘？）從來唔會做呢樣嘢，就算2009年有少少抑鬱，所有病徵都出晒嚟，食唔落嘢，瞓唔到又會無端喊，但都冇諗過死。（唔想做娛樂圈？）我嘅性格做娛樂圈係好奇特嘅一件事，我為人直接，諗嘢係『一條直路』，同人講嘢係有嗰句講嗰句，唔係勁Social嘅人，本身講嘢又唔叻，估唔到喺娛樂圈做咗十年！」

而向來是書展常客的傅穎，今年亦推出第7本書《在摩天輪上》，繼續走才女路線，她說：「一路鍾意寫嘢，每年都寫，今次以散文形式為主，冇以前咁多相，但有啲插圖。以前寫嘅嘢係唔開心，連Negative（負面）都寫落去，今次正面好多！（事業線相？）今年冇，因為本身都冇。」

對於o靚模寫真混戰被狠批意淫過火，傅穎說：「每個人有佢自己嘅選擇方式出寫真，對我嚟講冇乜太大影響，呢個市場有Demand（需求）同Supply（供應），係一個趨勢！」

問到會否心血來潮再出性感寫真？她笑說：「到時變中女寫真，畀自己美好回憶，最好去遠嘅地方影。」除了出書外，她還會到台灣拍劇：「今次角色幾大挑戰，飾演俏秘書。（惹火性感？）對住某啲人會好姣，非常積極同主動，以前未試過呢啲角色，豁出去啦！」

後記：青葱無悔

回首過去10年，傅穎經歷不少風浪，至今仍歷歷在目，她說：「呢10年做咗好多嘢，但又有好多嘢未做，Cookies年代第一場騷、做過咩拍過咩MV我仲記得。本身係怕悶嘅人，要做唔同嘅嘢，唔可以坐喺辦公室做白領。（後悔入行？）我無悔入行！」